اختر شريك حياتك ب 3 طرق

حاجة معظم الشباب بيفكر فيها كتير وتقريبا كلنا لينا تجربة مع الموضوع ده هي «الارتباط»، مبدئيا كدة يعنى إيه ارتباط؟ ارتباط يعنى أبقى مرتبط بالشخص اللى قدامى ومعايا على طول وبحكيله مشاكلى ويحكيلى مشاكله وكل الكلام اللى إحنا عارفينه ده طب إيه أنواع الارتباط ؟؟
_ فيه ارتباط صداقة.. وفيه ارتباط عاطفى « صحوبية».. وفيه ارتباط رسمى، تعالوا نمسك كل نوع من دول بقى ونتكلم فيه شوية.
أولا: ( ارتباط الصداقة)
كتير مننا بيبقى عنده بنت زى أخته بيتكلم معاها علطول ف كل الأمور اللى تخصه والعكس برضه بنلاقى بنات عندها صديق ليها برضو بتحكيله على طول أمور حياتها ممكن يكون الصديق ده ( أخ.. جار.. زميل دراسة.. زميل عمل ) أيا كانت صفته إيه.. الشخص ده بيمثل أهمية كبيرة جدا ف حياتنا بس لازم يكون فيه حدود وخطوط حمراء للعلاقة دى.. يعنى إيه حدود وخطوط حمراء ؟
يعنى يا سيدى وانت ك "شاب" كده بتعامل البنت دى اللى هي صديقتك، تخيل على طول أن أختك بيحصل معاها كده والعكس.
يعنى م الآخر خلى ربنا قصاد عينك وإنتى كمان خلى ربنا على طول أدامك مش أي حاجة نعملها وخلاص ونقول دا إحنا إخوات والعلاقة مش هتطور لأ ساعات كتير أوى بتطور وبتحصل بلاوى!!
لا مانع من تعامل الشباب والبنات مع بعض بس في إطار الأخلاقيات والقيم.
ثانيا_ الارتباط العاطفى
الصحوبية، النوع دا بقى من الارتباط أنا بعتبره مرضا ووباء تفشى في المجتمع للأسف! عايزك تروح أي مكان كده ( مول. كافيه. جامعة. حديقة... إلخ ) هتلاقى واد كده فرفور ماسك واحدة فرفورة برضه من إيدها ومش بعيد تلاقى إيده على كتفها عادى جدا متستغربش!!
تعالى اسأله بقى مين دى يا حبيبى؟ يقولك بنبرة رجولة كده دى صاحبتى!! طب دا يقربلك إيه يا بنتى؟ ده صاحبى
طب يعنى بتقضوا حياتكم إزاى ؟ عادى بنكلم بعض طول اليوم ما عدا اوقات النوم والاكل وبنخرج مع بعض علطول بقى وكده.
طب أنت يابن الحلال هتتجوزها ف الآخر؟ لا ياعم عمرى ما أتجوز واحدة مشيت معاها، طب انتى يا بنت الحلال هو ماشى معاكى على أساس إيه ؟ على أساس إنه قالى هيخطبنى بعد الكلية وقالى ميقدرش يعيش من غيرى.
أحب أقولك إن طول ما الجاموسة بتديله لبن ببلاش مش هيفكر يشتريها! مش عشان تغيظى صحابك ولا قرايبك أو جيرانك اللى من سنك تقومى تمشى مع واحد تحت اسم الصحوبية والحب والكلام الفارغ ده!
طب سؤال للشاب اللى مصاحب ده.. أنا ممكن أمشى مع أختك، هتقبلها عليها ؟؟...
طب ما اللى انت متنيل ماشى معاها دى ليها أخ وعيلة بيخافوا عليها هتقولى مهى لو متربية مكانتش مشيت معايا وأنا مليش دعوة.
أقولك خليك أنت متربى يعم ومتشيلش ذنبها خلاصة الكلام... ( اتق الله حيثما كنت ) كل كلمة بتقولها وكل مسكة إيد بتمسكها وأى فعل بتعمله.. هتسأل عنه يوم القيامة أمام المولى عز وجل.
ثالثا «الارتباط الرسمى»
هو ده النوع الوحيد اللى نقدر نسميه ارتباط لأن ربنا سبحانه وتعالى هو اللى شاهد عليه، مفيش أجمل من لذة الحب الحلال يعنى تكلمها قصاد أهلك عادى من غير ما تطلع البلكونة وإنتى كمان تردى عليه عادى من غير ما تقفلى باب أوضتك أو تكلميه على أنه واحدة صاحبتك مفيش أجمل من أنك تخش البيت من بابه طب في واحدة أنا بحبها بس لسه مش قادر أرتبط بيها رسمى وعايز أعترفلها بحبى ليها.. أعمل إيه ؟
أقولك أنا تعمل إيه.. روح قولها أنا بحبك ومعجب بيكى بس مش طالب منك نمشى مع بعض ولا عايز رقم تليفونك بس لما ربنا يقدرنى وأقدر أتقدم لأهلك هخش بيتكم من بابه واللى فيه الخير يقدمه ربنا... وتقفل على كده.
والله العظيم هي هتحس انك راجل وتستحقها حتى لو كانت مش حاسة بحاجة ناحيتك.. بس طالما إنت حسستها إنك بتراعى ربنا فيها، هي من غير تفكير هتحبك وتحس إن إنت اللى جدير بيها خلاصة كل الكلام اللى فوق ده إنى عايز أقولكم « من يتقى الله يجعل له مخرجا » أشكرك على وصولك لهذا السطر ويا رب أكون وصلت وجهة نظرى صح.