أن تكون فاشلا

الموضوع ده غير معبر تماما عن حقيقة أي إنسان لكن هو عبارة عن موقف بنعدى بيه كلنا.. يعنى لازم نبقى متفقين من الأول كده إن مفيش حد فاشل نهااائيا..
أولا ايه معنى الفشل؟
_ الفشل هو التوقف عن المحاولة أو الرضا به كلنا مرينا بلحظات فشل وإحباط كتير جدا فحياتنا وفي كل مرة كنا بنفتكر إن هي دى النهاية وخلاص الدنيا كدة انتهت..!!
من وجهة نظرى إن الفشل هو "قرصة ودن" ربنا بيوقعك عشان تراجع حساباتك وتشوف انت فشلت ليه؟؟ وتغير مسارك للمسار الصح، وساعات الفشل اللى انت شايفه ابتلاء بيبقى مانع لابتلاء تانى أشد وأعظم منه بمراحل.. زى ما بنقول إحنا بالبلدى كده "قضى أخف من قضى".
لازم تبقى عارف إن الفشل مش صفة إنما هو مجرد غلطة أو مرحلة مؤقتة بنعدى بيها عشان نتعلم من اللى فات ونكتسب خبرة، عشان كده بيقولوا "وراء كل لحظة فشل خبرات لا تدرك".
تعالى نشوف مع بعض كده قصص للبعض المشاهير والعظماء..
بيت هوفن: كان بيمسك الآلات الموسيقية غلط ومش عارف يمسكها ده غير إنه فقد السمع بعد كده.. اللى هو بقى من أشهر مؤلفى السمفونيات في العالم!!
توماس إديسون: من وهو صغير كل المدرسين بتوعه قالوا إنه طفل غبى ومش هينفع يكمل تعليمه وبقى عم إديسون اللى اخترعلنا المصباح الكهربى!!
والت ديزنى: مشروعه اترفض من كل استديوهات أمريكا وأعلن إفلاسه أكتر من مرة.. لكن بعد كده بقى مؤسس شركة ديزنى العالمية!!
آينشتاين: الراجل ده اللى كل طلبة علمى بتسب وتلعن فيه.. منطقش إلا وهو عنده 4 سنين ومكنش ينفع يكمل تعليمه برضه زى إديسون عشان فهمه كان بطىء لكن بعد كده بقى آينشتاين صاحب النظرية النسبية!!
أوبرا: اترفضت من أكتر من 50 دار نشر عشان غير مؤهلة للوظيفة، لكن بعد كده بقت أوبرا أشهر مذيعة ومقدمة برامج في العالم
ستيف جوبز: وهو عنده 30 سنة اترفد من الشركة اللى هو أصلا مؤسسها.. تخيل انت عملت شركة وأسستها قام اللى فيها طردوك منها، طبعا جاله انهيار عصبى وإحباط لكن بعد كده بقى مؤسس شركة أبل العالمية!!
ميسى: وهو عنده 11 سنة استبعدوه من فريق كرة القدم اللى كان فيه بسبب بطء النمو بتاع جسمه وخلل في الهرمونات، لكن بعد كده بقى أشهر لاعب في العالم وصاحب القدم الذهبية!!
قارن نفسك بالناس دي، أنت اللي تقارن مش تسمع من غيرك، قارن هما عملوا إيه وانت عملت إيه؟؟.. هما وصلوا لإيه وانت عاوز توصل لإيه؟؟
طب تعالى كده أحكيلك كمان قصة عن شاب عادى زيى وزيك.. الشاب ده كان في أولى ثانوى شاطر جدا ودرجاته كلها كانت عالية في كل المواد كان بيحب علم النفس جدا فقال يخش علمى علوم ويخلص ويخش طب نفسى ويبقى دكتور في التخصص اللى هو بيحبه ويطلع دكتور نفسى.. فعلا، لما دخل سنة 2 ثانوى وكان علمى علوم.. وجه وقت الامتحانات دخل الامتحانات.. وحل كويس ومستنى النتيجة بقى.
لقى نفسه جايب في الكيمياء 24 من 50!!.. وفي الرياضيات 23 من 50!! أصبح مجموع السنة بعد الدرجات دى 62%! واحد مكانه عايز يخش طب نفسى وهو قسم علمى علوم يعنى المجموع ده يدوبك يدخله جهنم!!
طبعا اضطر ينسى كل أحلامه اللى كان نفسه يحققها ومبقاش أدامه غير حلم واحد إنه يخلص مرحلة الثانوى دى على خير ويخش أي جامعة حكومة وخلاص، طبعا كان لازم يحول أدبى في سنة 3، وسنة 3 دى كان فيها مادة علم النفس اللى هو بيحبها.. فضل يزاكر طول السنة بجد.. وجه في آخر السنة لقى نفسه جايب في علم النفس 50 من 50!! والفلسفة 50 من 50!!
أصبح مجموع سنة 3 لوحدها 92 %! لما السنتين بقى اتضموا على بعض بقى المجموع الكلى نحو 80 % والتنسيق حدفه على كلية تجارة!! المهم دخل الكلية وبدأ ياخد كورسات تفيده في مجال العمل بعد البكالوريوس، وبالصدفة البحتة.. عرف إنه ممكن ياخد كورس تدريب مدربين (TOT).. طبعا ساعتها حس إن فيه بصيص أمل إن حلمه يتحقق من أول وجديد.. وفعلا خد الكورس ونجح فيه، ودلوقتى بقى طالب في كلية تجارة ومدرب تنمية بشرية، عااايز أقولك إن الشخص ده هو أنا دلوقتى.
متستسلمش أبدا للفشل.. لو باب اتقفل في وشك، هتلاقى 100 باب غيره يتفتحلك بس انت اسعى وحاول ومتوقفش وتيأس ومتسمعش للناس خالص لأن طول ما انت ماشى ورا كلام الناس، انت كده بتضيع نفسك بإيدك ومش هتوصل لحاجة.
انت مش فاشل.. واعمل زى ما الرسول (صلى الله عليه وسلم ).. اللهم إنى أعوذ بك من العجز والكسل.
وعايز أحذرك من حاجة.. اوعى تاخد قصص الخاطئين وتطبقها على نفسك.. مش كل واحد دخل مجال وفشل يبقى انت كمان هتفشل زيه!!
مش أي بنت اتجوزت واتطلقت.. يبقى تقولى لأ مش هتجوز! لكن حاول تحلل أخطاءك عشان تطلع بخطوة جديدة وخبرة زيادة.
اوعى تقول أنا فااشل.. مفيش حاجة اسمها أنا فاشل.. فيه حاجة اسمها خطوة لازم تتاخد سواء كانت صح أو غلط..