للظلم حدود

أنا لوحدي
وفرحانة أني مش مع حد
سعيدة بوحدتي لكن.. تعبت بجد!!
إجابات كتير
تايهة ما بين الأسئلة والمسألة
هي أني أصلا م البداية جيت فِ الزمن الغلط
مش حنفي عن نفسي الغلط
أنا كل زوايا العقل فيا
صواميلها ضايعة ومحتاجة فعلا تتظَبَط
أنا مش ملاك ولا عمر يوم كان لي جناحين
أنا طير حزين
كان نِفسه يرسَى ف أي عِش
لكنه كان ضعيف وهَش
عشان كدا كان لازم يقع
أنا كنت ريشة فِ وسط ريح
بتتمرجح بقلب جريح
وفجأة لقيت عمري اللي ضاع مني
بيستهبل ومستكتر عليا أعيش
خرجت برا حدود الكون
قابلت ناس مش م البشر
وصّلني عقلي للجنون شفت النفاق داء وانتشر
تفتكروا دا حكم القدر؟
لأ مش قدر!!
تقدر تقول عليه يمكن "قانون الغاب"
حلم "اليوتوبيا" كان سراب
مفيش مدينة من الأساس
عشان تكون يوم فاضلة كل الحقايق باطلة
والموت حقيقة مؤكدة
علشان كدا.. بحلم أموت
مش عارفة ليه الدنيا حر
مع أن الجو برد جدا فِ الشِتا
أنا حاسة نفسي مُشتّتة
مابقتش فاهمة أنا عاوزة أيه لحظة دفا فيها الشفا
من كل أوجاع السنين بس الحنين
شِبه اختفى الخوف معشش فِ المكان
والحزن منقوش ع الحيطان
ودموعي نازلة ب حُرقة ليه ساعة ما بسمع للأدان
يا رب الظلم ما لُه حدود
وأنا اتظلمت كتير أوي
وباب العدل كان مسدود
وامتى الحق يكون قوي
يا رب ما تسبنيش كدا
مش عايزة أعيش متنكّدة
أنا عشمي فعلا فيك كبير
وواثقة - بل - متأكدة
من قدرتك يا رب
أنا فِ نهاية المطاف
مش طالبة إلا محبتك
طمعانة بس ف رحمتك
طمعانة بس ف رحمتك!!