بالفيديو.."خلاويص" لفرقة إسكندريلا

من كلمات الشاعر أحمد حداد، وألحان حازم شاهين.. قدمت فرقة إسكندريلا أغنية "خلاويص" على خشبة مسرح الحرية للإبداع بالإسكندرية..
_ خلاويص؟
_ لسة شوية
_ ممكن تدينى لحظة من وقت حضرتك؟
أقولك ع الخلاصة اللى تفرّق كترتهم
لو كبرت مخك.. ح يسرقوا ثورتك
ولو كبرت دقنك ح تسرق ثورتهم
_ الفوانيس ..........
_ ........ كلها مطفية
_ خلاويص ؟
_ لسة شوية
قلنا الشهدا باصين على المنظر من فوق
وكل المصريين بتشبه للى مات
و لشمس كل يوم تطلع علشان نفوق
وقلنا ألف عروسة بتشاور م السماوات
_ لألف عريس .....
_ ........ قالوا بلطجية
_ خلاويص ؟
_ لسة شوية
الأشجار والبيوت والتاكسى والكورنيش
بيقولوا مش بنأيد اليفَط اللى فى إيدينا
بنأيد الميدان والثورة وأكل العيش
بنأيد القصاص م اللى قتلوا أهالينا
_ننده يا بوليس ......
_ ....... ردوا الحرامية
_ خلاويص ؟
_ لسة شوية
ما يقدر الخسيس.. يموّت الحرية
ولا تقدر المتاريس.. تنسّينا القضية
لسة لسة لسة
ما خلصت الكوابيس
لسة لسة لسة
اللعب فى الكواليس
لسة لسة لسة
الدم على القميص
لسة لسة لسة
فيه تكملة للقصة
_ الشعب جالوا
_ صحوة قوية
_ النور نداله
_ بالتضحية
_ الشهدا قالوا
_ لسة شوية
صوتنا اتنبح
فى المليونية
ابنى لمح
الثورة جية
مهما اتدبح
لسة شوية
_ سكتّونا ؟
_ لسة شوية
_ فرقّونا ؟
_ لسة شوية
_ زهّقونا ؟
_لسة شوية