شلاليت عم فريد

سايق عليك النبي.. لتقول لي رايح فين
وآخرتها أيه الحكاية في كافة الميادين
وللا حنفضل كده ماشيين شمال ويمين
طواحين كلام شغالين والناس لنا سامعين
والدولة مش عزبة ملك البعض يا إخوانَّا
والشمتانين وسطنا بيشدوا في لجامنا
ما تفوقوا أحسن بلدنا ضايعة قدامنا
وحنعمل أيه وللا أيه يا خلق في وطنَّا
الثورة مش بالخطب ولا بالزلط والطوب
ولا بالكلام اللي شايفه ع الحيطان مكتوب
الثورة دي مسئولية تحقق المطلوب
مش كل حبة نلاقي الحال كده مقلوب
سنين في هيصة ونفسي أعرف بقى المسئول
ومين بيحكم.. ومين حاكم بعرض وطول
هي الحكاية كلام في كلام وبال مشغول
والكل في مظاهرة وبتهتف وزي الغول
يا مصر فوقي بقى الثورة تضحيات
وعقول رجال كلها فكر.. ونضال وثبات
مش محتاجين بلطجية يعملوا لنا حاجات
وبكره حنشوف بقى مين ثوري بالحركات
يا خلق كُتْر الكلام بيهد ما يبنيش
فبلاش بقى فزلكة وفبركة وتشويش
وفي النهاية حتعرف كل ده كان طين
والثورة مش طنطنة وزنزنة وتهبيش