طريق النور

مفيهاش بيبي!!

علمونا في المدارس.. إن بلدنا كبيرة كبيرة.. عروسة جميلة وفيها حضارة.. وشمس منارة.. وتاريخها مكتوب بمهارة ع الجدران وفي قلوب الحارة.. وإنها أم.. حضن يضم.. المظلوم والمنكوب واللي قلوبهم فيها حجارة.. قامت الثورة.. نجحت طافت كل العالم.. قلنا الخير جاي لأحلامنا راكب ألف صاروخ طيارة.. عدي علينا سنة واتنين خطفوها جماعة.. في غمضة عين.. الكل أمين.. عشان التمكين فضلت تصغر تصغر تصغر.. علشان عايزينها تبقي امارة.. وأيامنا الحلوة بقت ضلمة ماشية بضهرها راكبة حمارة..
جوزناها عريس الغفلة.. خدها في سكة كده علي غفلة.. قلنا لروحنا يمكن عارف سكة جديدة تكون مضمونة.. يمكن بالصلاة والصوم.. عروستنا الحلوة.. تبقي عفيفة وتبقي مصونة.. صلينا معاها صلاة الجمعة.. لقينا خيوط الفجر حنونة.. ولما الصبح طلع من بدري.. في عز الضهر بقت مجنونة.. ايه ياعروسة.. ايه اللي جرالك.. قالت مش عارفة.. أصل صاحبنا جابلي عشيرته.. والشورة شورتهم مش شورته.. وكلامه الحلو عن النهضة أصبح تهديد ووعيد ومناهدة.. وجيرانا عرفوا حكايتنا وسيرتنا علي كل لسان.. وعريسي المعجون بالطيبة جابلي النايبة معاها الخيبة راكبة جمال زي الرهوان.. صدقت كلامه في الأول.. يقوله في لحظة ويسحبه في الحال.. وأنا علي الحال ده من يوم ما اتجوزته عايشة في غم وحزن وكرب.. وبعد ما عشمني بأكل الطرب.. نازل فيه طحن وضرب.. وجماعته تبارك أفعاله.. وتقوله خاليك صالب طولك وهددها بالويل والحرب.. وأهو من يومها ياعيني عليا شايفة الذل.. وعايشة في قهر.. يامين ينقذني من بلاويه.. يامين يحميني من أفعاله ومن ألاعيبه.. صبري ياناس فاض بيه خلاص.. والقنديل مطفي ومحتاس.. باع العفش مع البوتاجاز.. هربت مني الكلمة الحلوة وأيامي معاه صبحت سودة.. وأخرتها يا خلق جابت جاز..
قلت الخلع ده أحسن حل.. خللي أيامي زي الخل.. يا توافقي علي كل شروطي.. وشروط أهلي تكون محطوطة.. ح تفضلي كده زي المربوطة.. من غير ربط ومن غير حل.. جبت شهودي بتوع الانقاذ.. قالوا نقاطع العيلة ديه.. ولا نتكلم غير في التلفاز.. ونجيب حقك م اللي خانوكي.. بس الصبر ياحلوة شوية.. يمكن نعرف ازاي خطفوكي.. وكمان ضربوكي.. وزورو في الأوراق وباعوكي.. احكي ياحلوة وقولي كمان عن عريس الغفلة أبو ضحكة جنان.. وازاي ماشي في ديل القافلة.. وان الشاطر ماسك الدفة.. وسايق الكل بقوة وعافية.
قالت ح أحكي عن إيه وإزاي.. وأهو من يومي ياعيني عليه.. حتي الحلم اللي حلمت أنا بيه.. والخلفة تربطه من رجليه.. لاقيت أحلامي زي سراب.. وبعد ما كنت باغني سنين أغنية يا أمه القمر ع الباب.. حظي النحس صبح كداب.. وان كنتوا بتسألوا عن حاجة.. ح أقول ياكسوفي عريسي حبيبي.. عدي أيام وشهور في جوازنا.. كانت الحسرة هي نصيبي.. وان دكاترة كتير نصحوني.. معلهش يا حلوة.. يا أمورة.. الحدوتة مفيهاش بيبي.. ولا نهضة ولا دهب ولا فضة.. وان لازمله طاسة الخضة.. أو أجيب العسكر بالقوة.. وأفكر وأعيد من تاني ترتيبي.. وأهو كنت معاهم مستورة ستين سنة والكل حبيبي.