ساخرون.. «10 طرق» لتجنب «المخالفات المرورية»!

بعد التعديلات الجديدة على قانون المرور، وتغليظ العقوبات للحد من الحوادث المرورية، ونزيف الدماء على الأسفلت، نقدم لكم أفضل الطرق لتجنب المخالفات المرورية.
1- لو عندك سيارة «نقل» اركنها تحت بيتك، وماتمشيش بيها طول النهار ومعظم ساعات الليل.
2- لو الظروف حكمت أنك تسوق سيارتك «النقل»، فعليك بالسير في الشوارع الجانبية، وتجنب الطرق التي تقف عليها اللجان المرورية.
3- إذا كانت سيارتك «النقل» قديمة أو متهالكة، فإياك ثم إياك أن تطلع بها الكباري، عشان لو عطلت هيتعمل عليك «حفلة» يا أسطى.
4- لو رجال المرور ظبطوك بمخالفة اوعى تتهور وتحط أيدك في جيبك على طول وتطلع ورقة ب 50 جنيه وتديها لأمين الشرطة.. أنت كده هتودي نفسك في داهية يا برنس، وهيتعمل لك قضيتين واحدة ب «المخالفة» والتانية ب «الرشوة».. طب والحل أيه؟
سيب العربية واجري.. وأكيد هينشغلوا بالعربية ويسيبوك على ما تبقى المباحث تجيبك.
5- اوعى تسوق العربية وأنت سكران طينة، وعامل «دماغ قراقيش».. اصطبح في البيت يا زميلي.. ولو دماغك طارت منك خليك قاعد مكانك شوية على ما ترجع لك تاني.. وتعالى على نفسك شوية اليومين دول عشان غربال الحكومة الجديد له شدة، وشوية شوية هترجع الأمور لطبيعتها وترجع تسوق وأنت عامل دماغ وتصبّحْ على الباشا كمان.
6- خلي بالك.. لو معاك «مُزة» اوعى تمارس معاها «الرذيلة» في العربية، ولو حبكت معاك قوي افتكر كويس إللي حصل مع الشيخ «علي ونيس»!
7- لو أنت داخل على «كمين»، وحياة أبوك يا شيخ بلاش تعمل «غُرز» وتسوق بطريقة «رجل الغراب».. اصبر شوية وبعد الكمين اعمل إللي أنت عاوزه!
8- افتكر كويس أن «المرور» دلوقتي مابيفتش على «الطفاية» ولا «حزام الأمان»، ولا «لوحة الأرقام» ولا «متانة» العربية.. هو مشغول بتحليل المخدرات.. عشان كده ماتاخدش «الشيشة» معاك في العربية، وزي ما بتغير زيت للعربية حاول تغيّر دمك قبل ما تنزل من البيت، وماتسألنيش إزاي؟!
9- لو عندك «موتوسيكل» أو «توك توك» حاول تدخله دلوقتي أي «حضانة» لحد الأمور ما تهدى شوية، عشان لو اتاخد منك مش هيرجع لك تاني، اللهم إلا إذا...!
10- لو أنت ماشي على «رجلك» إياك أن تسير «عكس الاتجاه»، فالمسموح لك أن تسير «عكس عقارب الساعة».. ولو كنت محظوظ وشغال، يبقى اعمل حسابك وأنت رايح الشغل أن يكون معاك «فيشك وتشبيهك» و«شهادة حسن سير وسلوك» مختومة من اتنين موظفين مرتبهم لا يقل عن ألف وسبعميت جنيه!
وصحبتكم السلامة..