يا خوفي

بكلمك..
وكأني عارفاك من زمان
وألاقي قلبي يحن لك
وروحي هايمة ف المكان
وأستنى صوتك ف وداني يقول: حبيبتي..
واحشاني بحس روحك تنده لي
وهواك مشقلب لي كياني
كل أما أشوفك بتلخبط
من فرحتي القلب يزأطط
ألاقي روحي بتتنطط ع العشق
أيه ناقص تاني
ساعات بحس أنك ابني
والشوق لعندك بياخدني
وأسرح بعيد أوي بخيالي
وأنيّمك جوا ف حُضني
ولما تشبع حنيّة تقوم تبصلّي فِ عنيا
وأتوه ف وسط عينيك دِيا
وادوب ف حبك فِ ثواني
يا خوفي لو تبقى أناني
وتقول لقلبك ينساني
وف لحظة تبعد عن قلبي
وتسيبه عايش وحداني
ساعتها مش حقدر أسامحك
مهما عيناك تترجاني
وأقول لك الله يسامحك
دي قلوب كتير تتمناني