مستخدمات «فيس بوك» عن «العريس الثري».. «هدير»: «يا واخد القرد».. «لبنى»: «الغني هيفلس بسببي».. «أمينة»: الفلوس بتروح وتيجي.. «نسمة»: «ولو مال الدنيا بحالها متعوضنيش عن حبيبي»

قرار الزواج هو القرار الذي يسعد الآباء، ويمنح الأبناء إقامةً مجانية في جزيرة السعادة، والاستقرار الذي ينشدونه، إذا تم اتخاذُه بشكل سليم، ولكن من يتخذ هذا القرار، ومن له الحق في اتخاذه؟.. تبقى الفتاة هي صاحبة الكلمة والقرار الأخير!
«فيتو» رصدت تعليقات وآراء ناشطات «فيس بوك» في معايير اختيار فارس الأحلام، وشريك الحياة بالنسبة لهن، ومعايير اختياراتهن، هل العقل أم القلب أم الاثنان معا؟ وفيما يلي أبرز التعليقات:
هدير محمد: يا واخد القرد على ماله بكرة يروح المال ويفضل القرد على حاله.
مها جميل: حبيبي بس المهم مش يسيبني بعد ما أفضّله ع كل حاجة.
منة عصام: حبيبى بس يكون راجل وقد كلمته وييجى يتقدملى مش يخلع.
بسمة غالي: أحب أقول لكل اللى قالت حبيبي إنتي كدابة يا سعدية واحتمال تبقي زى ميمى في مسلسل ابن حلال.
نور الهدى: أكيد حبيبى هو اللى كل حاجة عندى وبعدين الفلوس بتروح وتيجى لكن الحبيب ميتعوضش.
ريم خالد: بما إنى مبحبش فهختار الغنى.
لبنى عصام: أنا عن نفسى هختار حبيبى علشان الغنى هيفلس بسببى.. فالأحسن حبيبى لأن ده مش هبقى معاه عاوزة حاجة غيره هو.
فادية حسن: أنا اخترت حبيبي وربنا وأقسم بالله بقى بيعملّي أكتر من اللى الغني كان هيعمله وكفاية أوي إنه يكون بنفس ومقبول.
أمنية عصام: الفلوس بتروح وتيجي بس الناس اللى بنحبهم مش بييجو تاني، أنا أختار الحب لأن هلاقي فيه سعادة مش بتتوصف.
أحلام محسن: لو على البنت هتختار حبيبها حتى لو مش لاقى يأكل، بس الأهل للأسف هيختاروا اللى حالته المادية كويسة وهيضغطوا على بنتهم، بس لو بتحبه بجد هتحارب الدنيا كلها عشانه.