المعلم خشبة يمارس عادته بالتواجد فى كل تجمع أو تظاهر أو اعتصام أو احتجاج داعيًا ربه أن يرزقه بعدد لابأس به من الموتى أو القتلى. الكاميرا على المعلم خشبة مندسًا بين اللجان الشعبية التى تشكلت لحماية مترو الأنفاق فى محطة روض الفرج من متظاهرى دوران شبرا الذين اتجهوا لقطع خط المترو، المعلم خشبة ينزوى جانبًا ليحدث قطنة صبيه المعلم خشبة: أيوه ياواد يامغلبنى انت بتعمل إيه؟ قطنة: باكل يامعلم. المعلم خشبة: بتاكل إيه اوعى تكون بتاكل مربة؟ قطنة: لأ يامعلم أنا جبت علبة كشرى من عند أبو طارق. المعلم خشبة: وماجبتش من كشرى التحرير ليه؟ ماهو أقربلك ولا هى عطلة وبس؟ أكيد قفلت المحل ورحت اتسكعتلك ساعتين علشان تجيب علبة الكشرى دى. قطنة: أبدًا وحياة غلاوتك هى نص ساعة بالتمام والكمال قفلت فيها المحل. المعلم خشبة: نص ساعة تقفل المحل ده خراب مستعجل انت قاعد تاكل أانا بشر عرق هنا وقرفان. قطنة: انت فين يامعلم؟ المعلم خشبة: أنا فى روض الفرج مع المتظاهرين بتوع دوران شبرا ربنا يكرم بخشبة ولا اتنين بس باين عليها حتعدى على شر إصابات بس ماهى أيام نحس أنا مش عارف إيه اللى بيحصل ده أنا كنت متفائل بأيام الجمع والمظاهرات والأموات. قطنة: معلش يامعلم بكرة ربنا يبعت. المعلم خشبة: أنا حاطط أملى على يوم الأحد اللى جاى ناوى أنزل على الاتحادية، ثوار الاتحادية بيقولوا إنهم قرروا العصيان المدنى المفتوح وكمان قرروا يعطلوا المترو ويقفلوا طريق صلاح سالم ويقطعوا كوبرى 6 أكتوبر، وطبعًا الأمن مش حيسكت وحيبقى الدم للركب ده أملى ياواد ياقطنة. قطنة: ربنا ينولك إلى فى بالك يامعلم ويحقق أملك وتولع يوم الأحد وخلينا نسترزق. المعلم خشبة: مين ده اللى يولع يلا؟ قطنة: الاتحادية يامعلم الاتحادية. المعلم خشبة: أيوه بحسب قصدك حاجة تانية، قولى مفيش أخبار عندك؟ قطنة: لأ يامعلم مفيش الوضع هادى هنا كل الحكاية شوية هتافات بيقولوا ارحل يا يامرسى ياحرامى الكرسى. المعلم خشبة: هتافات؟ إحنا حنقضيها هتافات؟ الهتافات دى مابتأكلش عيش وقال إيه الثوار فى الاتحادية كاتبين يافطة معلقنها على بوابة 4 فى القصر عاوزين مرسى يحل الجماعة، بيحلموا دول تقريبًا بيناموا عريانين فى البرد مش متغطيين كويس، وعايزينه يلغى الدستور ويعلن عن انتخابات رئاسية جديدة. قطنة: دول بيستعبطوا هو مرسى عبيط؟ علشان يلاقى نفسه فى قفص زى مبارك ده ماصدق خرج من السجن. المعلم خشبة: على قولك ياولا أول مرة تقول حاجة صح المهم أنا حسيبك دلوقتى وأشوف لى حتة اتدارى فيها ولو محصلش حاجة حرجع على التحرير على طول أصلى جعت وعاوز آكل. قطنة: اشتريلك علبة كشرى أو طاجن مكرونة؟ المعلم خشبة: لأ أبعت لأمك فى البيت تبعتلنا مع الواد كولونيا عامود الأكل فيه الكوارع والفتة والشوربة اللى عملتها النهارده وماتقربش منه لحد ماآجى. قطنة: حاضر يامعلم بس يرد عليا الواد كولونيا. المعلم خشبة: الواد ده أنا زهقت منه خلاص ماتطلبهوش أنا حطلبه بنفسى أديله كلمتين فى جنابه وابعته بنفسى، سلام.. وحياة أمك وماتوقعش كشرى على سجادة المحل. قطنة: حاضر يامعلم تيجى بالسلامة.
