المعلم خشبة.. حلقة رقم (3) .. الانطلاق إلى العالمية!

المعلم خشبة فى مكتبة بميدان التحرير يتحدث إلى صبيه قطنة بعد جمعة الرحيل
المعلم خشبة: شوفت يافقرى زى أمك أهه نقك وقرك علينا عمل فينا إيه؟
قطنة: هو أنا عملت حاجة يامعلم؟
المعلم خشبة:هو فيه بعد ده عمل عملك أسود ومهبب، جمعة زى دى والدنيا والعة مايموتش فيها ولا واحد؟ الصحة بتقول161 مصابًا فى القاهرة والمحافظات ومفيش ولا حالة وفاة واحدة وبتقول كمان إن عند بيت مرسى فى الزقازيق مفيش برضة ولا واحد مات كل الحكاية 17مصابًا بس.
قطنة: هو أنت بتصدق وزارة الصحة يامعلم؟ دول كدابين عمرهم مابيقولوا الحقيقة.
المعلم خشبة: طيب يا أبومخ ضلم اخطف رجلك لحد الموقف وانزل ع الزقازيق شوف حد مات ولا مفيش.
قطنة: واحنا مالنا بالزقازيق يا معلم؟ احنا مالناش فرع هناك.
المعلم خشبة: نفتح ياحيلة أمك أنا لو طلت افتح فرع فى سوريا حفتح بيقولوا بشار الأسد عمال يقتل فى الناس هناك بالكوم يعنى الرزق هناك بالعبيط.
قطنة: ده فى سوريا يامعلم وأنت حانوتى ثورة 25 يناير يعنى مصر مش سوريا ولا أنت ناوى تبقى دولى؟
المعلم خشبة: وماله ياولا أنت مش بتشوف رجال الأعمال بيفتحوا فروع فى دبى والسعودية وفرنسا؟
قطنة :ايوة بشوف.
المعلم خشبة: لية أنا بقى ما افتحش فرع فى سوريا؟
قطنة: افتح يامعلم أنت حر.
المعلم خشبة: هو أنا حفضل متكول على مرسى والإخوان؟ لأ الراجل باين عليه خستع لما جمعة زى دى ماينوبناش فيها قتيل واحد ايه اللى جرالك يامرسى ماكنت كويس.
قطنة: الداخلية مش بتساعدة يامعلم مقصرة معاة.
المعلم خشبه: ماهو الإعلام واقف لهم زى العضمة فى الزور داهية تاخد الإعلاميين على الصحفيين اللى حيوقفوا حالنا دول همه مالهم باللى بيموت واللى يصحى مايخلوهم فى حالهم ويسيبونا نسترزق.
قطنة: وماله يامعلم نشوف لنا صرفة مع بتوع الإعلام والصحفيين دول.
المعلم خشبة: هاتلى ياولا 2صحفيات ولا تلاتة ولا أربعة كل واحدة منهم تمسك فرعًا من فروعنا وتبقى المتحدث الرسمى باسم الفرع وكمان المستشار الإعلامى للفرع واهه كله دعاية لينا واطعم الفم تستحى العين.
قطنة: أفكارك حلوة يامعلم بكرة ننزل إعلان فى الجورنال نطلب فيه الصحفيات دول.
المعلم خشبة: خد بالك م المحل أنا حقوم أشوف الواد حسين المحامى اهه صايع وقاعد على القهوة لا شغلة ولا مشغلة أخليه يمشى فى إجراءات فتح فرع سوريا واهه ننفعه بقرشين تلاقيه ما اتعشاش من امبارح وكله بثوابه المحامين بقوا أكتر م الهم ع القلب وأكتر م القضايا
قطنة: أنا لمحته عند محكمة عابدين من ساعة.
المعلم خشبة: وأنت إيه اللى وداك هناك ياحيلة أمك؟
قطنة: كنت باكل يا معلم.
المعلم خشبة: ماهو أنت مش فالح غير ف الأكل زى أمك جاتكوا القرف انتوا الاتنين أنا ماشى خد بالك من المطرح.
قطنة: حاضر يامعلم سلام.
المعلم خشبة: سلام ياحيلة أمك.