فيلم الأرض 2013 على طريقة حمدين والبرادعى وأيمن نور !!

فيلم الأرض 2013 ........................ إيهاب طاهر
بطوله حمدين صباحى، محمد البرادعى، أيمن نور وضيف الشرف السيد البدوى
حمدين صباحى: حكاية الحوار دى يا أيمن يا نور ملعوب واتعمل علينا علشان الانتخابات وقرار مرسى ينزل والانتخابات تتم فى ميعادها وطظ فى المعارضة والثوار وجبهة الإنقاذ وطظ فيا وفيك وفى البرادعى وفى السيد البدوى
البرادعى: إن الله مع الصابرين يا حمدين
حمدين: البلد حتروح والأمر لله، دلوقتى أكبر من فى البلد حيخاف ويتهد ويسكت، ماحدش مكوى فى البلد دى إلا اللى عايش فى نارها
البرادعى: هو أنا اتخليت عنكم عمرى ما أنا سايب قصرى وولادى وأحفادى وأمريكا وقاعد معاكم ليل نهار فى الجبهة
نور: بعد إيه يا برادعى؟ بعد ماخربت مالطا
البرادعى: لما دعا الداعى جيت، هو أنا عشت بره بخطرى؟ اتخليت عنكم بخطرى؟ ما هو كان أكل عيش وبعدين أنا أيام مبارك
حمدين: أيوه، أيوه أيام مبارك حاربنا الظلم سوا وأيام الإنجليز وأيام السلطة ورحنا الشام والعراق فى البرد والتلج نحارب، شوفنا الموت بعنينا دفنا مننا ناس فى التلج لا خفنا ولا ولينا، لأننا كنا رجالة ووقفنا وقفة رجالة، وفى سنة ثورة 19 حاربنا مرة تانية مع سعد باشا حرقنا الغيطان وقطعنا السكة الحديد ضد الإنجليز، ضربونا، حبسونا، مات منا أولاد، إنما كنا رجالة ووقفنا وقفة رجالة، وفى الانتخابات اللى فاتت انتخابات مبارك بلاش نتكلم عن النتيجة إنما إحنا وقفنا مع بعض وسمعنا كلامك كانت النتيجة إيه تهنا كلنا لكننا كنا رجالة ووقفنا وقفة رجالة، ولما كانت حياتنا كلها متعلقة بشعرة وبينا وبين الموت خطوة واحدة ماخفناش هجمنا بصدورنا وحاربنا عدونا لأننا كنا رجالة ووقفنا وقفة رجالة، وبعدين دلوقتى بقينا فين؟
كل واحد راح لحاله، كل واحد شق طريقه، كل واحد افتكر نفسه ونسى الباقيين، أنت يا برادعى سبت البلد ورحت تاكل العيش التوست والكايزر المتمرمغ بتراب الأمريكان، وأنت يا نور عملت فيها مطيباتى وحلال العقد والمشاكل ومقرب وجهات النظر وقعدت تجالس وتساير مرسى والكتاتنى، وأنا إيه ؟ أنا راخر فضلت كافى خيرى شرى فضلت عايش ساكت صابر، عايش على أيام زمان وثورتى ونضالى زمان وحماسى أيام الجامعة ووقوفى مع الغلابة على أمل تيجى يا برادعى وتنفخ فى صدورنا علشان نصحى من جديد نصحى من جديد لكن فين فين؟ كانت أيام زمان اللى ماتتعوضش، كان عندنا مروءة، كان عندنا قلب، كنا رجالة وكنا فخر البلد، بشرفها وسيرتها وادى النتيجة اللى وصلنلها دلوقتى الإخوان ركبونا ومرسى بيبيع ويشترى فينا، وإحنا قاعدين نتكلم فى الجبهة ونشكى ونولول زى النسوان
اتفضل يا برادعى آدى أيمن نور وآدى السيد البدوى وآدى عبدالهادى وآدى دياب وغيرهم كل ولاد البلد قاعدين يتفرجوا علينا وإحنا قاعدين حطين إيدنا على خدنا، قاعدين نتكلم ونلطم زى النسوان
اللى يقول بكره تتعدل واللى يقول الصبر طيب واللى يقول كلام، واللى مايعرفش يقول إيه، بقينا عايشين فى كلام، نايمين فى كلام، ساكتين فى كلام، كل حياتنا بقت كلام فى كلام فى كلام الفاتحة على رجالة مصر يا ولاد ...
موسيقى تصويرية وأغنية مصرنا الخربانة نرويها بدمانا.. ونزول كلمة البداية والتتر.