مواجهة

طول عمر الخبراء والمستخبرين والعلماء والمستعلمين والدكاترة والمدكترين بيقولوا حل مشاكل مصر كلها فى إيد الشعب، قلنا إزاي؟ قالوا: يبطلوا خلفة، الناس عمالة بتزيد، وإحنا بنقول ونعيد وما فيش فايدة.
شوفتوا بقى حكومتنا الرشيدة والرياسة المجيدة، والاخوان واحزابهم العتيدة العنيدة، حلوها فى غمضة عين. قسموا البلد اقسام، القسم البريمو يضم حزب الحرية والعدالة، والاحزاب الإسلامية والمتأسلمة يخلفوا على كيفهم ويتجوزوا مثنى وثلاث ورباع سرا وعلانية حسب الشرع والشريعة، وطبعا ذريتهم حتطلع ذرية بريمو زى أهاليهم، اما الاقسام الاخرى من شعب المحروسة فستختفى من البرية رويدا رويدا، منهم قسم حيقابل رب كريم تحت عجلات القطارات، أو تحت انقاض العمارات، وقسم ثانى حياخد وقت لغاية ما يودع لما مية المجارى تشتغل فى كلاويهم فيتكلوا على الله واحد وراء الثانى، وهناك قسم ثالث عدده مش كثير حيتسلى عليهم حازم وعصابته بالفرفر والخرطوش بعد ما يقبضوا الملطوش.
فاضل القسم الكبير اللى بيضم ناس كثير، واللى ابتدى عقله يطير منهم من فقد الامل واتجه الى العلى القدير بالدعاء ان يزيح الغمة ويخلصهم من الحمي، واتكوم فى بيته لا عايز يكلم ولا يشوف حد، ومنهم من جات له حساسية وهرش كل ما يسمع سيرة حد عريان، أو شاطر، أو مرشد، حتى لو كان مرشد فى قناة السويس اللى ناويين يبيعوها، وده حيموت لوحده من الغيظ.
وضمن الناس الكثير اللي مسكتهم الكوابيس وبيقوموا من النوم مفزوعين على صرخة واحدة: باطل.. باطل.. الدستور باطل.. الإعلان الدستورى باطل.. ال؟ باطل.. ودول مصيرهم العباسية حيث الراحة الأبدية.
اما النسوان يا ولداه بعد التهميش والتطنيش وده طبعا عشان همّ السبب فى إفساد أخلاق الرجالة وبيخرجوهم عن وقارهم فيتحرشوا بيهم كانت النتيجة انهم طلعوا غلبهم على ازواجهم لما لقوا الطبخة القرديحى اللى بتسد رمق العيال بتتكلف فوق العشرين جنيه، حتى الست المحترمة بتاعت المحكمة الدستورية ما خلصهمش نتعايق بيها قدام العالم المتحضر وندعى ان الست واخدة حقها تالت ومتلت فادوها استمارة 6.. فاضل قسم لسه بيدوحر قال عايز يبقاله رأى فى اللى بيحصل فى البلد نصحوهم يعرضوا نفسهم على العالم النفسى الجليل الدكتور أحمد عكاشة قال لهم بصراحة ومن غير لف ولا دوران إن الجماعة مش حاتديهم فرصة فالبلد بلدهم والرياسة والحكومة والشورى تبعهم وإن عقدة الاضطهاد والذل اللى قاسوا منها هى السبب فى منظومة قيادتهم الانتقامية.. تخليص حقوق يعنى من المصريين واللى يتشدد لهم.. آملنا فى الله ثم فى جبهة الإنقاذ والشباب اللى زى الفل إن الصندوق الباقى لايسرق هو الآخر.