مات الكلام!!

كل حاجة فِ الدنيا عادى
وكل شيء فِ الكون مباح
صرختك.. دى عليك تنادى
اوعى تندم عاللى راح
ياما صرخنا من جوانا
وياما ملينا الكون بدموع
لو جوانا زى برّانا
كنا محينا أي خضوع
لكن خلاص.. ماعادتش فارقة
حب.. غيرة.. قسوة.. فرقة
كدب.. غش.. خيانة.. غربة
كله واحد.. كله جاحد
والأخوة.. والصداقة
والشهامة.. والبراءة
والطيابة.. والخيابة
والرتابة.. والكآبة
والعزيمة.. والهزيمة
شغل حلق حوش وسيما
والصراحة والوقاحة
والبجاحة والتناحة
كله عادى.. كله هادى
ناس تزيّف.. فِ الحقايق
والصراع.. بين الشقايق
واللى حُبه.. كان خطيئته
واللى دينه.. كان جريمته
ناس بتاكل.. م الزبالة
وناس تصاحب.. ناس زبالة
كله عادى.. يا بلادى
صوت شهيد.. واقف ينادى
كنت فاكر نفسي عايش
لقيت خيال الموت قصادى
مات الكلام !!