" جرب إنك تبقى مكانى "شعر ل "وليد الوصيف"

جرب إنك تبقى مكاني
-------------------
رصاصك خلى ضنايا شهيد
وضيع عيني وضهري وسندي
نهيك عن إنه حياتي وعمري
نهيك عن إنه روحي وكبدي
جرب إنك تبقى مكاني
جرب إنك تبقى أبوه
ترجع بيتك تسأل عنه
أمه تقولك ناس قتلوه
تفضل تضحك قوي وتقهقه
إنتِ يا بت عبيطة بجد؟
ابني حبيبي طول عمره في حاله
وعمره في عمره ما زعل حد
تلمح دمعه بتجري في عينها
تعرف إن كلمها بجد
ترجع تسأل تاني وتالت
نفسك يبقى هزار مش جد
لحد ما تسمع صوت في الشارع
عمال يصرخ مات الورد
تجري تلاقي تابوت فيه ابنك
يولع جسمك رغم البرد
وبعد ثواني تلاقي تابوته
مرفوع بين السما والأرض
كل الناس تحت جناحه
راحة تصلي عليه الفرض
وبعد ما يسكن ابنك قبره
تنزل تسجد جنب القبر
وتسأل ابنك مين الجاني
وتسأل ربك قوة وصبر
تبدأ تسرح في ابتساماته
وطيبة قلبه وكل حاجاته
تبدأ تسأل عن عكازك
وابنه وزوجته بعد وفاته
ترجع بيتك تلمح ابنه
بلعب حبه ويسأل حبه
جدو يا جدو فين راح بابا
قوله تعالى وجيب اللعبة
تنزل دمعة عينك منك
تشد حفيدك بين أحضانك
تثبَت كل الدنيا في نظرك
يطلع صوت من بين أسنانك
بابا يا عمري خلاص في الجنة
يرفض صوتك يقفل فمك
يصرخ صرخة ترج الدنيا
ترسم همه وتزيد همك
يمسك صورة أبوه ويعيط
تعالى يا بابا راجع لي الآية
من هايصلي معايا العيد
مين هاينام في الشتا ويايا
مين ها يقدم لي في مدرستي
ويوصي عليه مدرستي
ويجيب لي هدايا وألعاب
لم يشوف نجمة في كراستي
أرجوك بابا مش عايز أتيتم
عايز أخ وأخت كمان
عايزك لما أكبر تخطب لي
ويوم فرَحي تركبني حصان
قولي يا بابا ليه قدرت تسبنا
وتمشي يا بابا من غير باي باي
أنا وماما وتيتا وجدو
غلابة يا بابا وماحنش هاي
جرب إنك تبقي مكاني
ورد يا جاني على طفل صغير
وقبل ما تنطق شوف أحزاني
يمكن تفهم أو تتغير
جرب إنك تبقى مكاني
جرب إنك تبقى أبوه
ترجع بيتك تسأل عنه
أمه تقولك ناس قتلوه