شهادة فتاة: "عمرى ماهنسى يوم الختان"

واصل اليوم الجمعة، ائتلاف الجمعيات الأهلية لمناهضة ختان الإناث، نشر مشاكل السيدات اللاتى تعرضن للختان، ومدى المشاكل النفسية والجسدية التي تعرضن لها، ويأتي ذلك ضمن الحملة التي أطلقها الائتلاف تحت عنوان: "لو بتحبها متختنهاش"؛ وذلك للتوعية بمخاطر الختان النفسية والجسدية.
"أنا اسمى أمنية، عمرى كان 9 سنوات في أجازة آخر العام تم الحديث عن عمل طهارة وتم الترتيب لها في أسرع وقت، لأن البنت كبرت وجسمها فاير ونفرح قبل الأجازة ماتخلص "وكأنها دخلتى" نجيب مين طب نروح للدكتور، ودكتور ليه ماهو فيه داية كويسة أوى مختنة ومولدة بنات كتير، "قالت جارتنا لأمى".
اتفقوا وجابوا الداية "أم حمدى"، مش هنسى شكلها ولا اسمها ولا صوتها اللى بيرن في ودانى لدلوقتى ولا شكل موس الحلاقة اللى اشتغلت بيه من غير حتى بنج، ولا صوت صرختى وهما مسكنى من كل حته كأنى ذبيحة. وبعدها جسمى همد وحسيت بوجع وحرقان كبير " منتهى الألم " وبعدها "دى بتنزف يام حمدى دم كتير والبنت عندها سرعة ترسيب عالية أصلا"، لا ده عادى بيحصل كتير كأنها خبطت في حاجة واتعورت مش بتنزل دم وجمدى قلبك بنتك زى الفل وصحتها حلوة هاتيلها أكل كويس بس، "حوار بين أمى والداية"، وأنا هموت من الرعب وبعيط ولاكان حد سامع حاجة،
يوم عمرى مانسيته ولا هنسااااااه بكل كلمة آه قلتها وكل نقطة دم نزفتها.
وحرقان شديد في البول لمدة طوييييلة، وبعدها بفترة التهابات كتييييييرة مبتخلصش ومن كتر الالتهابات ماما ودتنى للدكتور وهناك الدكتورة قالت لماما "هي بنتك متختنة" قالتلها "آه ختان العادى بتاعنا ده" قالتلها "أحب أقولك إن بنتك كانت مش محتاجة ختان، واللى عملهولها حمار وشال الجزء الموجود كله".
هي: نزف ؟ آه كتير.أكييييد
أحب أقولك إن بنتك للأسف مش هقدر أساعدها إنى أكتبلها مرطبات للجزء ده وكريمات للالتهابات كل لما تجيلها، ومطهر
إنما الالتهابات مش هتخلص
وبقى عندى نفسية زى الزفت وعقدة أنى مختلفة
*بسبب الالتهابات المتكررة واللى لما كانت بتجيلى مبعرفش أتحرك كتير وألم شديد ومع الاستمرار عمقان شديد في المنطقة الداخلية
* الإحراج في الحديث عن الموضوع أمام باقى أفراد العيلة وأمام الصبيان
* لما كبرت وفى وسط كلام زميلاتى عن الحب والإحساس به، عدم الإحساس من ناحيتى والخوف من الزواج لعدم تكرار نفس المأساة والنزيف
* ذكر لكل تفاصيل الحدث المؤلمة عند الحديث عن الختان
ومن المعرفة الشائعة من الكتب والنت عن وجود عدم تجاوب مع الزوج، ونفوره إذا وجد عدم إشباع للزوجة أو هدوء "رعب الزواج الفاشل واستسهال عدم الدخول في أي علاقة حب".
كده كده هتفشل يبقى قلتها أحسن.