هاجم مرتضى منصور، رئيس مجلس إدارة نادي الزمالك، السويسري كريستيان جروس، بعد تعادل الفريق الأبيض أمام سموحة، مساء الثلاثاء، كاشفًا عن خصم نصف راتب الجهاز الفني بالكامل، و100 ألف جنيه من كل لاعب. وتعادل الفريق الأول لكرة القدم بنادي الزمالك مع نظيره سموحة بهدف لكل منهما، في اللقاء الذي جمع بينهما، مساء الثلاثاء، على استاد برج العرب، ضمن منافسات الجولة السابعة من مسابقة الدوري الممتاز، حيث تقدم الزمالك عن طريق يوسف أوباما في الدقيقة 70، وتعادل حسام حسن لسموحة في الدقيقة 86. وقال مرتضى، خلال تصريحات تليفزيونية لقناة «الحديث اليوم»، موجهًا حديثه لجروس: «سمعنا كلامك في كل حاجة وقولنا حاضر، وكل اللاعيبة اللي قولت مش عايزهم مكسرين الدنيا في أندية تانية، لكن مش كده أنت مش إله كورة، وأنا هتدخل رسميا». وواصل منصور: «أين اللاعبين الذي تعاقدت معهم بمبالغ كبيرة، فين لاعيبتي؟ فين حميد أحداد اللي كان نجم وهداف في بلده، كل اللي بيحصل ده غلط، أنت حرقت دم الزملكاوية، وأنا مش هستنى نخسر نقاط تانية». واستمر في حديثه قائلًا: «سيطت الإخوانجي علي ماهر اللي بيقعد يتنطط ده زي البتاع اللي في الجنينة، على حساب الزمالك، وأنت ياعم حسام حسن فرحان إنك جبت جول فينا، ما أنت كنت هتموت وتيجي الزمالك، والأخ ياسر إبراهيم هو أبو جبل بيلعبوا بغل قدامنا مش فاهم ليه». وهاجم رئيس القلعة البيضاء، المهندس فرج عامر، رئيس نادي سموحة، قائلًا: «أنت طالع تقولي لاعيبة سموحة كانت زي السكينة في الجبنة مع لاعيبة الزمالك، إيه القرف والمستوى الهابط ده؟ أنت كنت رئيس لجنة الشباب والرياضة؟ أنت عاملي بيان إنك أنت اللي مشيت؟ مش أنت اللي مشيت، أنت لا تصلح لهذا المنصب». واختتم: «أنا حزين كده من اللي حصل قدام سموحة، وبقول للزملكاوية من حقكوا تزعلوا، واللي حصل ده جريمة ارتكبها المدرب، وكنا ممكن نكسب 4 لولا استهتار اللاعيبة، عشان كده هيتخصم من كل لاعب 100 ألف جنيه». وتعادل الزمالك مع سموحة رفع رصيده إلى 14 نقطة احتل بها المركز الثاني خلف المتصدر بيراميدز، بينما رفع رصيد سموحة رصيده إلى 10 نقاط احتل بها المركز السادس بجدول مسابقة الدوري المصري الممتاز.