«الراجل مش عايز ست ذكية عشان عينه زايغة ومش عايزها تكشفه على حقيقته، ولا عايز زوجة قوية الشخصية عشان تكون معتمدة عليه طوال الوقت في كل حاجة»، هكذا لخصت الفنانة ريم مصطفى، وجهة نظرها في الرجل الشرقى، خلال لقاء إعلامي سابق، قبل أن تخوض اليوم معركة كلامية -يتخللها السخرية والإحراج والتهكم من الرأي الآخر- دفاعًا عن حقوق المرأة أمام الثلاثي أحمد فهمي وباسل الخياط وكريم فهمي، في برنامج «قعدة رجالة» على قناة «دي إم سي»، لكنها في الوقت نفسه كان لها آراء قد تكون غريبة للبعض. الملل بيكون من الستات الروتنية تحدث ريم، عن حالة الملل التي قد تؤثر على الحياة الزوجية بين الزوجين، قائلةً: «فيه رجالة بتبعد عن البيت والمسؤولية، وساعات السبب بيكون إن الستات روتينية، مش بتعرف تجدد، وتطلع الراجل من حالة الملل اللي هو فيه، بس الموضوع في النهاية قائم على الاثنين». الراجل بيتغير بعد الجواز والحل عند الست ترى ريم مصطفى، أن المسؤوليات الزوجية والحياتية مقسمة مناصفة بين الرجل والمرأة، متحدثة عن ما يعرف ب«الرجل الممل» بقولها: «ممكن يكون السبب من الست، وممكن كمان يكون الزوج لسه ما اتأقلمش مع الحياة الزوجية، وده بيفسر أن الشخص المرح قبل الزواج مش بيكون كده بعده، وممكن يكون السبب إن مسؤوليات الزواج كتيره على الراجل». وتابعت ريم: «لازم نعترف إن الست ممكن تعمل كل حاجة الراجل بيعملها والعكس صحيح.. بس هي لازم تكون متجددة في عين زوجها عشان يقل الملل عنده، وده يجعل العبء الملقى عليها أكثر من الرجل». الست كائن عايز يتدلع اعترفت ريم: «فيه ستات زنانة وأنا أعترف بكده، بس الراجل لازم يتأقلم مع ده.. ولازم يسمعها كلام حلو ولو من باب المجاملة، ويضحك على عقلها عشان هي بتحب ده، الست كائن عايز يتدلع». وقدمت ريم مصطفى، نصيحة للنساء مفادها، أن التجديد ينعش الحياة الزوجية، بقولها: «لازم تكوني كل يوم بشخصية مختلفة مع زوجك، مرة تكوني هادية ومرة تكوني عصبية وهكذا.. أنا مجننة جوزي». ريم تهاجم أحمد فهمي ردت على حقيقة علمية -خاطئة- قالها أحمد فهمي، وهي أن «الست سبب خرس الرجل»، قائلة: «لما بتكون فيه كيميا بين الطرفين بتبقى الحياة هادية، ولو مش موجودة الدنيا بتبوظ»، مهاجمةً فهمي، بقولها: «أنت مُصر تهين الست.. الكتب اللي بتقراها لحستلك دماغك، أنت قاعد كل شوية تقول نظرية». النساء ناقصات عقل ودين لكن الغريب أن ريم، برغم دفاعها عن المرأة، إلا أنها أكدت صحة مقولتين، هما: «النساء ناقصات عقل ودين، فلازم الراجل يضحك على مراته بالكلام، والستات عاملين زي الأطفال، والرجالة قوامون على النساء»، مستطردة: «وبعدين الراجل لازم يكون عنده وعي أنه لازم ياخد الست على قد عقلها، ولو مش هايعرف يعمل ده يبقى بلاش بتجوز ويعيش حياته مع نفسه». وذكرت أن النساء تستطيع القيام بأعمال الرجل، لكن الرجل لا يستطيع القيام بمهام المرأة، موضحة: «أنا ممكن أعمل كل حاجة الراجل يعملها، ولو فيه قانون بيسمح للمرأة تحارب كنت أقدمت بس ما فيش». الراجل حصالة فلوس احرجت ريم مصطفى، أحمد فهمي، عندما اتهم المرأة بأنها محدودة الأفق، قائلة له: «أنا حاسة إنك بتتكلم عن نفسك»، مؤكدة أن المرأة «أزكى من الراجل»، مشيرة إلى أن الرجل الأجنبي يقدر المرأة أكثر من نظيره الشرقي. وهاجمت ريم، أيضًا كريم فهمي، عندما وصف المرأة ب«كائن ضعيف»، إذر ردت عليه: «قوة المرأه في ضعفها، والراجل ما يقدرش يعيش من غير الست، الراجل أخره بيدفع فلوس، يعني دوره حصالة، الست بتحس أن الرجالة خلقها ضيق».
