وصفوه بالطفل وأبو ضحكة جنان.. الفنانون ينعون عمرو سمير

خبر صادم فاجأ الجمهور والوسط الفني مساء أمس الأربعاء، بإعلان وفاة الفنان والمذيع عمرو سمير، ذو ال33 عاما، إثر أزمة قلبية في إسبانيا، ليكون الفارق بين عيد ميلاده وشهادة وفاته يومين فقط، وكان آخر ما تركه سمير قبل الرحيل رسالة واحدة لأمه ذكر بها: «بافرح جدا لما حد يقولي إني متربّي وعندي أخلاق، لأنك إنتي يا حبيبتي السبب في دا».
وأثرت وفاته في العديد من الفنانين الذين قرروا أن ينعوه على طريقتهم الخاصة على صفحات السوشيال ميديا، بين نشر ذكرياتهم معه والآيات القرآنية، ومنهم من طلب من الجمهور أن يُكثف الدعاء لأجل روحه، وفيما يلي أبرز الناعين..
دوَّن أحمد فلوكس: «الله يرحمك، دايمًا كنت مبتسم ومتفائل ووشك دايمًا كان بيضحك وأنت بتتكلم، ربنا يغفرلك ويُدخلك فسيح جناته، دعواتكم لعمرو. الشاب ده كان من أوائل الشباب اللي اشتغلوا مذيعين وكان ناجح، ومن أوائل المذيعين في جيله برضوا اللي مثلوا واشتركوا في أعمال سينمائية ودرامية كممثل ونجحوا، زي دوره في مسلسل «قضية رأي عام» مع النجمة يسرا... الله يرحمه».
بينما علقت ليلى علوي: «إنَّا لله وإنا إليه راجعون، الممثل والمذيع الشاب عمرو سمير في ذمة الله، ربنا يرحمه، يا رب خفف عن أهله ومحبيه وألهمهم الصبر».
وذكرت مها أحمد: « قلبي وجعني عليك قوي يا أبو أحلى وأطيب ضحكة، بس ماتعزش على اللي خلقك».
كما قالت سلمى صباحي، التي شاركته لفترة طويلة تقديم أحد البرامج: «يا قلبي ياخويا يا عمرو يا عشرة أجمل سنين، الله يرحمك ويغفرلك ويصبر قلب مامتك.. لا حول ولا قوة إلا بالله، عمرو، يابو ضحكة جنان مابتفارقش وشك، يابو قلب طفل بكل براءته وطيبته وعناده وغضبه وسذاجته وصراحته».
وأضافت: «دايما كنت باعتبرك أخويا الصغير، وعشان كده أنا وإنت كنا قريبين وما كناش بنتخانق.. كنت بتشترك معايا في حب فيروز وكنت بتحب صوتي ولما كان يبقى عندي حفلة تختار معايا هاغني إيه لفيروز، وتطلع في البرنامج تقول سلمى عندها حفلة يوم الجمعة، وكلنا هنكون هناك وهانستناكو، كنت جاري وكتير كنت بتوصلني بعد البرنامج، وإنت اللي علمتني أقول أذكار المساء واحنا مروحين في الطريق، كنت تقول وانا أقول وراك، ماكنتش تفوّت فرض، وكنت بتحب الحياة أوى يا عمرو معقول تمشي كده!».
وقال المنشد مصطفى عاطف: «أنا آسف إني بقالى كتير ماكلمتكش، بس عارف إنك إن شاء الله في مكان أحسن دلوقتي في جوار رب كريم.. ربنا يرحمك يا حبيبى ويغفر لك».
وكتب الفنان رامي جمال على صفحته الشخصية على "فيسبوك": «النهارده سمعت خبر وفاة اتنين شباب صغيرين زي الورد والناس تشهد لهم بالطيبة والأخلاق إيهاب حسن وعمرو سمير، ربنا يرحمهم ويصبر أهلهم، وماحدش يتعز على اللي خلقو، وأكيد مافيش خوف عليهم إن شاء الله وهما بين إيدين الرحمن الرحيم، دعواتكم ليهم بالرحمة والمغفرة وماتبخلوش عليهم بالدعاء، اللهم اكفنا شر موت الفجأة وأحسن ختامنا».
ومن جانبها علقت مي سليم: «على الرغم أن اشتغلنا عمل واحد، بس بجد من أطيب الناس اللى مش ممكن تنسى أخلاقهم ولا الضحكة اللى مش بتفارق وشه، الله يرحمك ياعمرو ويصبر أهلك، بجد مش هيبقي بعد ما تروح من الدنيا غير السيرة الطيبة، اللهم أجرنا من موت الغفلة ولا تأخذنا من الدنيا إلا وأنت راضٍ عنا يا رب».
وودعته بشرى: «الوداع يا صديقي، يا أخي الحبيب، صدمة كبيرة، وفاة المذيع الشاب عمرو سمير عن عمر ٣٣، هتوحشني قوي».
وعبر حسام داغر عن صدمته قائلًا: «أزمة قلبية، ياااه.. ببساطة كده، قلبك المليان بالحب لكل الناس تعب ماستحملش الدنيا، ضحكتك اللي ماليه وشك دايمًا ماقدرتش تقف جمبك النهارده، دايمًا كنت باصص للعالم بعين طفل، ومحتفظ بالطفل اللي جواك، ربنا يصبر قلبك يا طنط ماجدة، ربنا يصبر قلوبنا، اجري هتلاقي قوس قزح قدامك، اطلعه، هتلاقي الجنة مستنياك، مع السلامة يا حبيبي، مع السلامة».
ومن بين الفنانين الذين طلبوا من جمهورهم الدعاء بالرحمة والمغفرة لعمرو، كان أحمد السقا، ومحمد حماقي، وتامر حسني، وآيتن عامر، وزاب ثروت، وأمير المصري، وكريم فهمي، وعمرو مصطفى، وزينة، وروجينا، وعمرو يوسف.
يُذكر أن عمرو بدأت أولى خطواته بعالم الأضواء في سن عشر سنوات من خلال فيلم «القتل اللذيذ» مع الفنانة ميرفت أمين، ثم توجه للإعلام وعمل مذيعا لفترة طويلة وعرف ببرنامج «شبابيك»، وعاد من جديد للتمثيل من خلال فيلم «عودة الندلة» مع الفنانة عبلة كامل، ثم عدد من المسلسلات كان من أبرزها «جدار القلب»، و«قضية رأي عام»، و«مزاج الخير».