فيديو| أحلام السكندريين في 2017: «الأسعار تنزل علشان نقدر نعيش»

أحلامهم بسيطة مثل كافة المصريين، وهي أن يتوقف التصاعد الجنوني للأسعار؛ لتمر الأيام ب"ستر ربنا".. تلك ملخص طموحات السكندريين خلال عام 2017، التي تحدثوا عنها ل"التحرير".
يقول حمادة رمضان، شاب: "نفسي في 2017 تقل الأسعار، وكل حاجة تكون متوفرة للناس لأن إحنا كل يوم في غلاء، وياريت يكون في رقابة لأن التجار مزودنها على الناس جدًا".
ولم يختلف حديث منى أحمد حسين، ربة منزل، وأم لستة أطفال، عن سابقها، فقالت: "كل حاجة بقت غالية والتعليم مفيش ومفيش شغل كمان، إحنا بنتمنى في 2017 أن الناس تلاقي تعليم كويس، وإن الأسعار تنزل شوية علشان نقدر نعيش".
سعاد محمد، ربة منزل، أشارت إلى أنها لا تريد سوى أن تحيا في مستوى معيشي جيد، مكملة: "لأن إحنا مش عارفين نعيش والزيادة جت على كل حاجة، التعليم، والأكل، والأجهزة والأسعار زادت بدرجة فظيعة، حاجة حرام، فيه حاجات زادت الضعف 14 مرة".
ولفت مصطفى طلعت، دبلوم تجارة، إلى أنه يأمل في تخفيض الأسعار خلال 2017، وأن يجدا عملًا، قائلًا: "شباب في سني مفروض تخطب وتتجوز، لكن ده مبيحصلش علشان مفيش شغل، ولو فيه بيكون بمرتب 1200 جنيه أو أقل، ودا رقم ميكفيش أسبوع واحد لشاب بيحاول يكون نفسه ويجيب شقة ويجهز بيت، دا غير الدهب اللي بقى الجرام منه ب 600 جنيه".
حمدي إبراهيم علي، عجوز على المعاش، يقول إنه حتى المنتجات التي توفرها الحكومة للمواطنين، والتي تعد الأقل سعرًا، لا يقدر على شرائها الجميع، ويتابع: "أنا لسه شاري السكر ب 10 جنيه ونص، ودا من الجمعية.. يعني حاجة حرام، نفسنا الأسعار تنزل، الناس مش عارفة تعيش ومش لاقيين ياكلوا.. الفقراء ليهم ربنا.. كل حاجة غالية.. لو الوضع استمر كده مش هنعرف نكمل السنة الجديدة، الناس هتموت من الفقر".
وذكر الرجل المسن أنه يترجل على قدميه من أول حي البيطاش إلى آخره بسبب ارتفاع أسعار المواصلات، مضيفا "أنا معاشي 350 جنيه في الشهر، مقدرش أدفع كل شوية 2 جنيه مواصلات.. ياريت الحكومة تبص للفقرا والغلابة".