منى عراقي تهاجم «لميس» بسبب «هاينز»: «إنتي صوت المواطن الغلبان ولا رجال الأعمال؟»

انتقدت الإعلامية منى عراقي، صباح الجمعة، دفاع زميلتها الإعلامية لميس الحديدي، عن شركة «هاينز» للصناعات الغذائية، بعد استخدامها كميات كبيرة من الطماطم المصابة بالديدان والحشرات والمواد منتهية الصلاحية فى تصنيع المنتجات، بحجة «الاهتمام بالاستثمار والمستثمرين، وأنه كان ينبغي معالجة الواقعة بشكل أخر (طريق في النص)، قبل أن تصل إلى القضاء وقبل أن يتم التشهير بالشركة».
قالت عراقي، خلال تقديمها برنامج «انتباه»، عبر فضائية «المحور»، «رد فعل الأستاذة لميس استوقفني الصراحة، هو الإعلام لسان مين بالظبط؟ لسان الناس اللي ملهمش ضهر الغلابة ولا لسان رؤوس الأموال؟ يا أستاذة لميس أنا فاهمة جدًا إنك بتدافعي عن الاستثمار، وكلنا زي حضرتك، يهم كل شخص في مصر الاستثمار والمستثمرين، بس أكيد مش على حساب الناس وصحتهم».
أضافت: «إحنا زي حضرتك مهتمين وغيورين على المستثمرين، بس مصنع بيخالف القانون، وبينتج مواد ضارة بالصحة، كاتشب فيه دود، نعالج مصيبة زي دي إزاي؟ حضرتك مش عاجبك طريق التقاضي والقانون وعايزة طريق في النص؟ طيب الربع طيب عشان خاطري! ده طريق النص ده هو اللي ودانا في داهية، ده اللي مزود أمراضنا وأمراض أولادنا هو طريق النص ده؟ ده بدّل ما تشجعي على الالتزام بالقانون؟».
استطردت: «لم تكتفي الأستاذة لميس بذلك، بل تتنبأ بأن مفتشي الصحة وضباط المباحث تحركوا بناءً على عمل كيدي، وأن ضبط أكثر من 62 طن منتج فاسد داخل المصنع ممكن ينتهي إلى لا شيء، وبتقول مين اللي هيتحمل الخطأ ده؟ حضرتك بتلّوحي بإشارة تهديد لمين؟ مصر يجب أن تكون بلد قانون، وهذه الرسالة الحقيقية التي يجب أن نوجهها للمستثمرين».