المدنى يُحاكم مدنيًّا د. رشا عبد الله

- المدنى يتحاكم مدنى، مايتحاكمش عسكرى.
- طب وانتم إيه مشكلتكم مع المحاكم العسكرية؟
- المحاكم العسكرية معمولة أساسًا للفصل بين العسكريين فى ما يتعلق بشغلهم العسكرى، يعنى مثلًا لو عسكرى ماسمعش كلام الضابط فى أثناء تأدية مهمة عسكرية يبقى لازم يتحاكم فورًا ويأخذ عقابًا رادعًا يكون عبرة لغيره، لكن المدنى يتحاكم مدنى.
- طب وبرضه إيه المشكلة إن مدنى يتحاكم عسكرى؟
- المحاكم العسكرية مافيهاش ضمانات عدالة كافية للمتهم. فى سبتمبر 2011 رئيس القضاء العسكرى السابق، قال إن فيه نحو 12 ألف شخص اتحاكموا عسكرى من أول الثورة. كتير من الناس دى اتقبض عليه بالغلط أو كان فى مكان الأحداث بالصدفة. فيه مثلًا واحد اسمه محمد إسحق كان عنده 19 سنة، لما اتقبض عليه اتحاكم محاكمة عاجلة جدًّا بتهمة حيازة مفرقعات وترويع المواطنين وكسر الحظر واتحكم عليه ب25 سنة سجن. أيوه تأبيدة. محمد قضى سنة فى السجن ووالدته البسيطة بتحاول تستنجد بأى حد لغاية ما القضاء العسكرى أعاد محاكمته بعد سنة وطلع براءة!! من 25 سنة سجن لبراءة!! وطبعًا محمد قضى السنة دى فى السجن دون أى ذنب. فيه زى محمد عشرات ويمكن مئات قضوا فترات فى السجن ظلم وبعضهم لسه فى السجن. فيه واحد اسمه محمد إيهاب كان عنده 17 سنة لما اتحاكم عسكرى فى سنة 2011 (يعنى كان يعتبر طفلًا فى حكم القانون). محمد اتقبض عليه فى خناقة واتحكم عليه ب15 سنة، قضى منها سنتين وفاضل 13 سنة.
- لكن رئيس القضاء العسكرى قال إن مافيش مدنيين فى سجون عسكرية..
- ده صحيح، همّ بيتحاكموا عسكرى وبعدين بيقضوا العقوبة فى سجون مدنية.
- طب ما هو برضه القضاء العسكرى قضاء زى غيره، يعنى ما يفرقش عن المدنى كتير.
- القضاء العسكرى أعضاؤه من العسكريين، يعنى بيبقى العسكريين همّ الخصم والحكم فى القضية، والمحاكمة بتتم فى عجالة شديدة، ففى معظم الأحوال المتهم مش بيلحق يجيب محامى أو المحامى مش بيلحق يطّلع على أوراق القضية. وبعدين مثلًا لو حد زنق عليك بعربيته وهو لابس مدنى وانت نزلت اتخانقت معه، ليه تلاقى نفسك أمام محكمة عسكرية؟
- هو ده ممكن يحصل فعلًا؟
- لسه حاصل مع شيكابالا من أسبوعين. شيكابالا كان راجع من الغردقة وفى المطار اتخانق مع واحد لابس تيشيرت أحمر. الرجل طلع ضابط طيار متقاعد، فالنيابة العسكرية أمرت بضبط وإحضار شيكابالا.
- طب وإيه اللى حصل؟
- حصل مصالحة بعد تدخّل المدربين وقيادات النادى، إنما شيكابالا طلع منها، لأنه «له ظهر»، أنا وانت وباقى المواطنين العاديين حنتعرّض لمحاكمة عسكرية فى ظرف زى ده.
- أيوه، بس فيه ناس بتبقى تهمتها الاعتداء على ضابط أو على منشأة عسكرية، دول نعمل فيهم إيه؟
- القضاء المدنى العادى كفيل بأنه يتعامل مع القضايا دى. عندك مثلًا أحداث الحرس الجمهورى، المتهمون فيها اتحوّلوا للنيابة العامة مش للنيابة العسكرية.
- أيوه، لكن فيه محاكمات محتاجة سرية، يعنى مثلًا قضايا التجسس والتخابر مع جهات أجنبية..
- تمام، القضاء المدنى عنده القدرة إنه يجعل جلسات قضية معينة سرية ويحظر النشر فيها، وكل القضايا دى القضاء المدنى قادر تمامًا على التعامل معها، مثلًا قضية الجاسوس الإسرائيلى عزام عزام كانت فى محكمة مدنية.. محمد مرسى شخصيًّا وقيادات الإخوان اللى بيتحاكموا دلوقتى بتهمة التخابر مع جهات أجنبية بيتحاكموا فى محاكم مدنية.
- أيوه، لكن برضه القضاء العسكرى ده موجود فى كل دول العالم..
- موجود فى الدول القمعية، إنما فى الدول الديمقراطية لو موجود بيبقى كل مهمته محاكمة العسكريين فى ما يتعلق بوظيفتهم العسكرية، لكن مش لمحاكمة المدنيين.
- طب وليه الضجة دى اليومين دول بالذات؟
- علشان دستور مصر اللى بيتكتب دلوقتى لازم تكون فيه مادة تحظر محاكمة المدنيين عسكريًّا دون استثناءات. المادة دى كانت موجودة فى مسوّدة دستور 1954، وكانت موجودة برضه فى الأول فى مسوّدة دستور 2012، لكن اتغيّرت فى المسوّدة النهائية. عايزين المادة دى فى دستور مصر القادم علشان نكون دولة مدنية حقيقية بتحترم الحقوق والحريات للمدنيين.
المدنى يتحاكم مدنى. لا للمحاكمات العسكرية للمدنيين.