#سايبها_ليه.. شباب التواصل الاجتماعي يردون على سؤال الرئيس

وجه الرئيس عبد الفتاح السيسي، اليوم الاثنين، سؤالا للناجين من حادث غرق مركب رشيد: «سايبنا ومزعلنا ومزعل أهلك ليه؟» خلال كلمته في افتتاح منطقة غيط العنب العشوائية بالإسكندرية بعد تطويرها، وعقب ذلك أسس مجموعة من مرتادي مواقع التواصل الاجتماعي وخاصة «فيسبوك» هاشتاج «#سايبها_ليه» ليجيبوا على تساؤل الرئيس.
وقال أحدهم إن: «اللي سابها.. سابها لأنه مش آمن على أهله وعرضه زي محمد السعيد صديقي اللي فضل مطارد بقاله سنين ولما الداخلية عرفت توصله امبارح مكتفتش بأنها تخطفه ومحدش عارف يوصله».
وكان الناشط خالد عبد الحميد من أبرز وأكثر المدونين على الهاشتاج وكتب عدة منشورات منها: «سايبها علشان وأنا ماشي في الشارع لقيت ناس لابسة مدني بتضرب بنات نزلت أحوش عنهم واتسجنت خمس سنين خايف أكون أحمد عبد الرحمن»، وقال في أخرى: «سايبها علشان ما اتصفاش زي اللي اتصفوا في شقة في أكتوبر واتقال عليهم ماتوا في تبادل إطلاق نار».
وقال آخر مع نشره لفيديو يحتوي حديث الرئيس، وقال: «سايبها عشان اللي قالوا: اللي مش عاجبه يغور»، وقالت آخرى: «سايبها عشان حضرتك لو فتحت باب الهجرة مش هتلاقي حد يقعد في البلد! ولو الانتحار مش حرام البلد هتتملي بالجثث في الشوارع»، وأضافت: «سايبها عشان مش هقدر أدافع عن أرض بلدي، ولو اتكلمت هتمنع من السفر واتحبس في البلد، أو هيطلبوا ترحيلي زي هشام زهير اللي لسة محبوس من 25 أبريل بالرغم من تسديد غرامة ال١٠٠ ألف بس عشان سوري لسه مخرجش!».
وقالت أخرى: «سايباها عشان ماتسجنش عشان عملت جمعية أهلية لمساعدة وإعادة تأهيل أطفال الشوارع #اية_حجازي»، وأضاف آخر: «سايبها علشان ما يتقتلش زي إسلام عطيتو وهو بيمتحن في كليته ويقولوا عليه مات في وكر وتبادل إطلاق نار»، وكتب مدون بعض من كلمات أغنية «بتناديني تاني ليه» للمغنية دنيا مسعود.
وقال أحد الذين كتبوا على الهاشتاج «سايبها عشان متمرمط في الشوارع بيدور على شغل يأكله ويشربه ويصرف على إخواته من غير حتى ما يدخر منه»، وكتبت أخرى «سايبها ليه؟ عشان ولا بياخد حقه في التعليم، ولا الصحة ولا الشغل ولا السكن، ولا لاقي أمن و أمان و لا عارف حتي يعترض ليخونوه، أو يسجنوه أو يخطفوه ويخفوه، أو يتصفي وقتي».