ممكن نتبرع كلنا خالد بيومي

عندى اقتراح أتمنى أن نضعه فى الاعتبار خاص بوزارة الصحة المصرية التى عفى عليها الزمان، والسبب معروف كل وزراء الصحة المصرية الذين تولوا المنصب أيام النظام السابق فى آخر 30 سنة، من سوء لمستوى المستشفيات العامة المصرية فى كل المحافظات فى كل شىء، من الخدمة العامة لموظفيها وهم معذورون لأن المقابل المادى سيئ للغاية، سواء مستوى العاملين فى خدمة التمريض للمرضى الوافدين على أى مستشفى تابع للحكومة المصرية، بعيدا عن المستشفيات الخاصة. الإهمال الجسيم من قبل الأطباء المشرفين نظرا أيضا لعدم الاهتمام الخاص بهم كأهم فئة فى المجتمع. سوء مستوى المشرفين من الوزارة نفسها، خصوصا ما يشاهدونه يوميا من أسرة ملوثة مواد طبية غير متوفرة، بل هنالك الأسوأ من هذا، هناك بعض المستشفيات المصرية فتح فيه المياه بتاعة المجارى، أقسم بالله رائحة كريهة يعنى أى مريض داخل فيها مفقود بإذن الله من الروائح المصرية العطرة التى تفرح كل مريض، وعلى حسب المرض ونوعه.
بصراحة أى مريض بيدخل محتاج إلى معجزة مش علشان هو مريض أو يعانى من شىء لا سمح الله، أبدا أبدا كم كل ما يسره يعنى الداخل فيها مفقود والخارج منها مولود، أى والله فى ناس قبل ما بتدخل لضيق اليد فعلا بتبقى عاملة حسابها على كفنها ومدفنها، لأنه عارف إنه صعب الخروح والله فيه واحد من أصدقائى الغلابة راح يزور شخص قريبه فى العناية المركزة، قالولوا ممنوع الزيارة علشان العناية فيها فيروس، شوفتو الكارثة والله العظيم حصلت فعلا من أيام قليلة.. سيادة وزير الصحة كل المستشفيات العامة محتاجة إلى إشراف كامل محتاجة إلى قسوة فى العمل التفتيشى، محتاجة إلى إعادة ترميم بالكامل تحتاج إلى عناية بالشعب المصرى الغلبان المكافح، يعنى لا نوم ولا أكل ولا دواء، فى النهاية ولا كمان مدفن، يعنى لا دنيا ولا آخرة، يا رررب ارحمنا.. سيادة الوزير مصر كلها تتبرع للمستشفى العملاق «57357» ومصر كلها تتبرع لمستشفى الدكتور مجدى يعقوب لمرضى القلب، وليه لأ إحنا كمان نتبرع للمستشفيات العامة المصرية التى تستقبل ملايين المصريين الغلابة يوميا، وليه لأ نطلق دعوة لدعم وتمويل كل المستشفيات المصرية العامة فى كل محافظات المحروسة، وأنا أول المتبرعين هى دعوة لكل المصريين علشان الغلابة، يا اارب ألاقى صدى للدعوة من خلال الإعلام ولّا هو شو وبس؟!