قال الناقد الفني، طارق الشناوي، اليوم الأربعاء، إن الفنان رامز جلال جنى على نفسه في السينما بسبب اتجاهه لبرامج المقالب، موضحًا: «فيلمه الآخير (كنغر حبنا) لم يحقق أي إرادات بسبب إن (رامز) مش قادر يتخلص من شخصية بتاع المقالب في رمضان». أضاف الشناوي، في برنامجه «حكايات فنية»، الذي يقدمه عبر فضائية «سي بي سي إكسترا»، «مقدرش أنكر كثافة مشاهدة عالية بيحققها رامز جلال في برامجه، بدليل المبالغ الضخمة التي يحصل عليها، ليس فقط هو، بل أيضًا لمن يشاركوه في البرنامج من الضيوف». وكشف «الشناوي» حقيقة «مقالب رامز»، قائلًا: «طبعًا اللي بيعمله رامز مش مقلب، ما يحدث يتم باتفاق مسبق، هو مش مقلب على الفنانين أو الضيوف اللي بيشاركوا، لا هو مقلب علينا، عشان إحنا بنصدق». وأوضح السر في تصديق الجمهور لهذه المقالب ومشاهدته لها؛ قائلًا: «الناس نفسها تتفرج على الفنان في لحظة على طبيعته، فيقولك إلحق فلانة شتمت، الفنانة اللي بنشوفها وقورة في التليفزيون تلاقيها شتمت، يقوم الجمهور يتبسط بسبب الشتائم بالأب والأم والبصق والضرب اللي بيحصل». تابع: «الجزء الأساسي في برامج المقالب إن إحنا كجمهور متواطئين، أنا نفسي متواطأ زيّكم لأن بتفرج برضو، وأنا بقول الكلام ده لأننا يمكن أما نعرف إن الفنان بيخدعنا نغير رأينا شوية، مع إني أشك، برضو هنفضل نتفرج على البرامج دي». وعن برامج المقالب التي أتجه إلى تقديمها الفنان هاني رمزي، بداية من رمضان الماضي، قال «الشناوي»: «هاني على قده، رامز مثلًا بيلعب بالملايين، وعشان كده بيجيب النجوم اللي بياخدوا ملايين، وهنشوف ده في برنامجه الجاي (رامز بيلعب بالنار)، في تكلفة إنتاجية عالية فعلًا، لكن هاني مش بيستضيف غير نجوم صف تاني، وبرنامجه (هاني في الأدغال)، اللي هيقدمه رمضان الجاي تقلص إنتاجه أكثر». استكمل: «هاني رمزي أفلامه مؤخرًا لم تكن على المستوى، وكنا متعودين إنه بيظهر كل رمضان بمسلسل وبإعلان، لكن ده انتهى مؤخرًا، لذلك هو الآن يتشبث بآخر شيء متاح له، وهو برامج المقالب، لكنه مش واخد باله كمان إنه بيلعب في دورى الدرجة التانية في الضيوف وفي الجمهور، مش دورى الدرجة الأولى زي رامز جلال».