علق الإعلامي عمرو أديب، على استشهاد 13 من رجال الشرطة، نتيجة إطلاق قذيفة هاون على كمين الصفا، الكائن بالطريق الدائري بدائرة قسم ثالث العريش؛ قائلًا: «الإرهاب في كل مكان، كل بقعة في العالم معرضة للإرهاب، شوفنا اللي حصل في تركيا وتونس وفرنسا، دول عملين حفلة عشان قبضوا على صلاح عبد السلام، أحد منفذي الهجمات في باريس، ده أوباما كلمهم باركلهم». وأضاف أديب، خلال تقديمه برنامج «القاهرة اليوم»، عبر قناة «اليوم»، «الموضوع مش سهل، وأؤكد أنه لن ينتهي ولن يهدأ، إحنا فعلًا بنواجه حرب حقيقية، وخلينا نقولها بكل صراحة، الإرهاب مش هيخلص، محدش يبقى قاعد على مؤخرته ويقولي الموضوع ده هينتهي إمتى؟ لا مش هينتهي، لأننا في موجة إرهابية وحرب حقيقية، بلدنا تعيش في ظروف غير طبيعية لذلك نشاهد أحداثا غير طبيعية». وتابع: «محدش يقولي اللي بيحصلنا بسبب ريحة الدم اللي في الهواء، إنتوا شايفين إن لو مرشد الإخوان خرج من السجن الإرهاب هينتهي؟ أبدًا والله، يا جماعة ده بديع بالنسبالهم كافر، مرشد الإخوان يا جماعة عند الناس دول كافر، خلينا نقولها بشكل مباشر كده، ولا إنتوا نسيتوا العملية الإرهابية اللي حصلت في عهد مرسي، الكلام ده كان بيحصل أثناء ولاية الرئيس مرسي برضوا، أوعوا حد ينسى وبلاش نضحك على بعض». استكمل: «أي حد بيتكلم في مصر عن أننا لازم نعيش في وضع طبيعي، بنقوله إحنا آسفين جدًا، إحنا مش مسئولين عن اللي بيحصل ده، مش إحنا اللي دخلنا الإرهابيين سيناء، ما يحدث ليس نتيجة لأن السيسي يحكم بالحديد والنار كما يُقال، إحنا عندنا إرهاب طول الوقت، في عهد مرسي وعهد مبارك، هذه الدولة مبتلاه بالمصائب طول الوقت، أنا كل يوم بفتكر بيت الشعر (كل خمسة أمتار أحفر قبرًا لأخي)، إحنا بنحارب».