الصورة معلومة إلى أحمد دومة

أشعار-طاهر البرنبالى
طبع النظام عَ النظام سابق وحالى
وف عِزّ قهر الشباب الضىّ أوحى لى
ماليش خصومة يا دومة مع العدالة
طول عمرى باغسل ذنوبى وأرد أوحالى
والمجد للشهدا وللشُعرا ولشعب داق المرار..
وباستمرار يقول.. مش راضى عن حالى
بس المؤكد راح ينسحب مُرّ السنين قدام جيوش الحالى
يا دومة قوم عَ الصبح واغسل وِشَّك
وعيش حياة كلها أفراح
الصورة معلومة ولا حاجة هتغشّك
نزل الستار والظلم بان عريان
وبورْدها الأوطان هتزيد جمال وحنان
ماعلّش يا دومة
دول ناس بقالهم سنين والصرخة مكتومة
ولا عُمرهم فكّروا ف الصرخة من أصلُه
وكل واحد بيعمل بأصله
فيه فرق بين الحر لما يثور..
وبين خسيس مِ الثوره سابت مفاصله
يا دومة يا شاعر يا بو المشاعر حرير
سلم لى عَ الزنزانة اللى متحددة
لأنها أشرف كتير..
من الزنزانة اللى وخدانا فى أحضانها
وبتدّعى شرف البراح والثورة والتغيير
سلّم لى عَ الجِراية واليَمَكْ
لأنهم أطعم وأبدع من طبيخ مغشوش..
مليان مذلَّة ورعب وكآبة
وقول لسور السجن ما أرحبك..
يا اللى انت أكبر خيال مِ العالم الكدابة
واركب جناح الحلم يا دومة
دا الحلم مش عايز عزومة
ياخدك معاه لباب مفتوح على آخره
ويبدد الكدب أبو الجيوب مخرومة
والكدابين يهربوا للجحور مِ النور
والصورة معلومة
كل اللى باع الدماغ وسابها ملغومة
راح ييجى يوم تنفجر على طلّته الأحزان
وآه يا دومة من الأحزان..
هىَّ الشرارة اللى بتشعل فى الحطام النار
والنار لا ترحم ولا تقبل الأعذار
اغفر لهم يا أحمد خراب العقول
اغفر لهم انت.. كفاية النار عليهم..
هتساوى بالأرض أسيادهم معاليهم..
أسيادهم اللى بيباركوا القروض والفروض
وكل ما الثورة ترعرع يقطفوا الورود
وأكيد أكيد أكيد مافيش للظلم دومة
وفيه للعدل دومة
لسه الخلايق ف اللحية مصدومة..
وامّا تفوق هتقوم بجد قومة..
تغيَّر الأوضاع وتعالج الأوجاع
ما احنا اللى شايفين بالعنين..
والصورة معلومة