باسم ردًّا على هجوم مشجعي الأهلي: «مابقاش راجل لو ماجبتش حق الزمالك»

كشف باسم مرسي مهاجم فريق الزمالك تفاصيل المشادة، التي حدثت بينه وبين بعض مشجعي النادي الأهلي في تونس بالأمس.
وقال مرسي عبر حسابه على "إنستجرام"، "توضيحًا لمشكلة امبارح اللي كل واحد طالع عمال يحلل ويقول كلام على مزاجه، أنا من أول ما لعبت في نادي الزمالك وأنا بتشتم بوالدي ووالدتي، وبيتقال عليا كل حاجة ممكن تتقال، تنك مغرور ده عايشها على الناس بيزعق وبيتنرفز على اللاعيبة، بيشتم زمايله في الفريق، عايز كل كورة تتباصى ليه، عايز هو بس اللي يجيب جول، ده بيروح للحلاق أكتر ما بيدخل الحمام، كل حاجة بعملها شاغلة الناس، أجيب جول ده بقى تنك ومغرور، مجبش جول ده مستواه بقى وحش ومبقاش زي الأول".
وأضاف "أطول شعري مش عاجب، أقصره مش عاجب، كل يوم اتصور مع الناس ومش عاجب، ويوم ما أكون تعبان من التمرين ومش قادر أتصور علشان بيبقى ورايا التزامات تانية، أبقى مغرور ده أنا بقيت أخاف أقول لحد سلام عليكم ليقولك باسم اتجنن ماشي يقول للناس سلام عليكم".
وتابع "عارف إني مش هاعرف أرضي كل الناس علشان لو رضيت كل الناس هبقى منافق، كل ده ولا أثر ولا هيأثر فيا علشان أنا عارف طريقي كويس، وعمري ما عملت ولا هعمل مشكلة بسبب التفاهات دي، وعارف إن ده ضريبة إني بلعب تحت اسم كيان وجمهور كبير هو نادي الزمالك اللي علشانه بجد ممكن أعمل أي حاجة".
وأكد "إنما توصل إن النادي اللي بلعب وبموت نفسي علشاه يتهان وأسمعها بوداني أكتر من مرة وماأردش وأجيب حقه من اللي غلط فيه، أبقى مش راجل، اللي عايز يغلط فيا براحته مش هرد عليه، بس نادي الزمالك خط أحمر، ولما بنقول ربك وطنك ثم الزمالك دي مش كلمة ولا شعار بنقولوا وخلاص ده شعوره حسينه ومصدقينه بجد".