ينفع تهامى وعبد السلام. وبرضه ينفع ساعات ريهام. وساعات بينفع حاييم كوهين. ضد المعارضة ومع النظام. من ده لدى، ومن دى لده! ينفع كده وينفع كده! تشوفه ساجد، تفتكره ماجد، وهو عبده فْ لحظة مزاج. وتقول: حيضرب، أتاريه بيهرب، ويخش تانى ف حالة انبعاج. يبان مخيمر، وهو عزة، مرات حسام اللى كان زينات. على طول بيزأر، مع إنه معزة! يا دوب تمأمأ فى الحمامات. ينفع فانلة وينفع كولون، وجزمة ميرى دابت خلاص. ويليق جونلة أو بنطلون أبيض ملزق ضد الرصاص. بضهره نسخة من بمبة كشر، وفْ وشه حاجة من جورج بوش. ونفسه يشبه ف الصورة تاتشر، أو حتى هتلر، ما يهمهوش. وفيه ملامح من الخديوى، وهو عامل فيها النديم. شكله النهارده عبده الحامولى. دايما بيشتم عبد الحليم. للصبح يسهر. ياكل ويتكرع. من بعد ما يلم الدولارات، الشعبة تحضر والرغى يتفرع. والليل يحب التجليات. حاكم الكرنب مفعوله جامد، بالذات فى إفراز الفتاوات. ويبان مركز، وهو واخد تعسيلة من زمن الأغوات. أوقات بيدى ع الشيخ مغاورى. وفجأة بيريز ينقع عليه. شوية عربى وشوية عبرى. حليب يا قشطة! أوكيه يا بيه! الصبح صفوت والضهر عبلة. وف العصارى جوه المجارى. وفى المسا داير بطبلة، عشان يدارى على اللى جارى، طول ما اللوارى بتشحن فياجرا، بالطبع لازم ياخد منابه. ناضورجى بانجو وحشيش وبودرة. قاعد مقرفص يحرسلو بابه. أيام بعمة وجبة وكاكولا. وساعات ف كازينو بعيد ع النيل. يلعب ساعات راعى الطفولة. كده أو كده حسب التساهيل. ثورى وحكيمة تسرق يوماتى م القصر أكل العيانين. تربى وحنوتى وكمان آلاتى، وزعيم بيخطب فى الملتحين. واهو اغتنى من المغارة. وفاز بجايزة إنسان سخيف. وبانى زاوية تحت العمارة. ومحل كشرى ف شارع شريف. شحات وباشا ومخبر خسيس. وبياخدو رأيه ف منع التفليس. عضو ف جماعة مالهاش ترخيص. مع إسرائيل ومع الرئيس. مرشد سياحى ومرشد بوليس. وبرضه مرشد فْ جماعة تانية. وكان موافق ع التوريث. يا دوب بياخد ف النطة ثانية. نوع م المربى وماركة سيجار. بس الشهادة: فارس خطير! سمسار أراضى وتاجر آثار. لكن شجاعته مالهاش نظير. فى مرة هاجم مسؤول كبير. ما خافش منه وبهدل كرامته. فرش الملاية لخالة بكير جار بنت عمة سواق سيادته. تاريخه مليان بالبطولات: هل من مبارز؟ ضحكوا وسابوه. كام مرة هاجم ممثلات؟ وجرى استخبا لا يمسكوه. من ده لدى، ومن دى لده. ينفع كده وينفع كده. تسألنى: مين دا؟ ما اعرفش أرد. شىء من بعيد بيبان بشر. وباء فظيع داير يعض. طب كنا فين لما انتشر؟ طب كنا فين لما انتشر؟