غنيم : أنا متفائل.. ولأول مرة فيه مرشحين رئاسة اتبهدلوا علشان يقنعوا الشعب بيهم

علق الناشط السياسي«وائل غنيم« على الموقع الاجتماعي «الفيس بوك» على فرز الأصوات الانتخابية الحدث الأهم في مصر الآن – بأنه متفائل حيث قائلا : مضطر أوضح إن تفاؤلي مش سذاجة ولا محاولة لتطييب الخواطر.. أنا فعلا شايف إننا في أوقات كتير بننساق وراء عواطفنا خاصة السلبية منها في حكمنا على الأمور وبنركز جدا في حسابات المكسب والخسارة اللحظية ومش بنشوف أثر اللي بنعمله على مدى خمس وعشر سنين.. بالراحة شوية وبلاش نستعجل في الحكم على معارك الثورة اللحظية.
وأضاف «غنيم» : حضرتك لأول مرة في مصر من أول ما اتولدنا فيه منافسة غالبا مش هتتحسم إلا بآخر كام صندوق.. وفيه مرشحين رئاسة اتبهدلوا عشان يقنعوا الشعب بيهم .. وفيه شعب نزل ينتخب ونسبة غير قليلة منه هتحاسب أي رئيس هييجي.. وكل مرشح رئاسي هيخسر الانتخابات فيه وراه دلوقتي عدد ضخم من الشباب هيشارك كتير منه بفعالية في الحياة السياسية.. وبعد كل ده زي ما قلتلكم.
وأشار «غنيم» إلى نتائج الفرز حتى الآن قائلا : 7 من كل 10 مصريين شاركوا في الانتخابات عبروا عن عدم رضاهم عن النظام القديم بتجاهل انتخاب رموزه واختيار وجوه جديدة «سواء اتفقت أو اختلفت معاها» .. وقضية تفتيت الأصوات بين المرشحين اللي مش محسوبين على النظام القديم دي مش مشكلة الشعب «اللي بعض الناس للأسف بدأ ينساق لعاطفته ويقول عليه جاهل» .. دي مشكلة المرشحين نفسهم .. احنا اللي هنحبط الاحباط يا شباب.