· سيناريو أي فيلم باعمله أنا بعتبره زي ابني واللي يغلط في ابني كأنه غلط في بالضبط واللي يغلط في يستحمل بقي فتح الفنان سعد الصغير النار علي زميلته سمية الخشاب.. مؤكدا أنه لا يوجد لديه مانع من أن يتسبب هجومه عليها في انقطاع علاقتهما ببعض كزملاء، وفي حوار لا تنقصه الصراحة ويتميز بالجرأة صرح سعد الصغير ل«صوت الأمة» عن كواليس استبعاد سمية الخشاب من فيلم «شارع الهرم» والذي كان من المقرر أن يقوم بالبطولة أمامها فيه وقال إن سمية تعاني من مرض جنون العظمة وحاولت الجور علي حق المؤلف سيد السبكي «وقطع عيشه» وتشويه السيناريو بتعديلات تضمن وجودها وسيطرة صورتها علي الشاشة.. «صوت الأمة» التقته فإلي التفاصيل. مشاكل كثيرة أحاطت بأحدث أفلامك «شارع الهرم» حدثنا عن خلفياتها؟ - سمية الخشاب هي السبب في كل المشاكل إللي حصلت للفيلم وكانت البداية لما جابت مؤلف تاني يعمل تعديلات علي السيناريو بدل سيد السبكي المؤلف الأصلي ووصلت معاه لفيلم ماسخ وملوش طعم وكانت عايزة تفرضه علينا عشان هي مع التعديل الجديد موجودة من «الجلدة للجلدة» زي ما يقولوا بمعني أنها كانت تريد أن تكون موجودة وظاهرة في الفيلم كله. وماهي هذه التعديلات التي تتحدث عنها؟ - كتير يعني مثلا أنا دوري طبال في الفيلم لقيتها عملاني سواق ميكروباص وبعدين سواق خاص ليها وده طبعا نسف دوري تماما، وألغت وجود أربع بنات من الفيلم واكتفت بواحدة فقط، دا غير انها اشترطت تشوف أعمال المخرج إسماعيل فاروق قبل ما توافق علي إنه يخرج الفيلم، من الآخر سمية الخشاب استفزتنا كلنا جدا وشوفت فيها جنون العظمة جامد أوي.. ولكن سمية الخشاب صرحت من قبل أن السيناريو الذي عرض عليها رديء جدا وطلبت تعديلات عليه لتجعله مناسبا وعندما رفض طلبها اعتذرت عن الفيلم؟ - ده كلام هي بتقوله عشان تعمل سمعة وحشة للفيلم ومفيش واحدة ترضي تشتغل بدالها فيه فتخضع لطلباتها لكن منين السيناريو رديء ومنين هي قبضت عربون الفيلم وغنت معايا أغنية دويتو للفيلم.. وماذا كان موقفك منها؟ - أنا راجل مبحبش الخيانة ومكانش ينفع أسيب سيد السبكي اللي بحبه واشتغلت معاه كتير وأروح مع سمية الخشاب بالسيناريو لمؤلف تاني ومينفعش أي فنان مهما كانت نجوميته إنه يأكل حق حد وهي حاولت تقطع عيشه وده اللي ميرضنيش وكان الطبيعي إن هي اللي تسيب الفيلم.. وماذا كان موقف «السبكي» منها؟ - وصلته لدرجة إنه يحلف ويقول علي الطلاق بالتلاتة ما أنت عاملة الفيلم ولازم ترجعي العربون فورا ولما سألته عن الأغنية الدويتو قالها دي بتاعتي وبفلوسي وهشيل صوتك منها وأحط صوت اللي هتيجي بدالك والموضوع ينتهي. ألا تري أن هجومك علي سمية الخشاب هذا يتسبب في قطع علاقتكما كزملاء؟ - سيناريو أي فيلم باعمله أنا بعتبره زي ابني واللي يغلط في ابني كأنه غلط في بالضبط واللي يغلط في يستحمل بقي. وماذا عن ترشيح جومانة مراد للقيام بالبطولة أمامك بدلا من سمية الخشاب؟ - أنا سعيد جدا بالترشيح ده وشايف إن الفرق شاسع بين الاثنين وشايف جومانة مراد بنت بلد وجدعة وعايزة تعلي نفسها وتعلي اللي معاها وأصيلة. بدون حسد.. أنت ستحيي فقرات كثيرة في حفلات الفنادق الخاصة برأس السنة كيف تري ذلك؟ - فعلا من فضل ربنا علي اني أنا المطرب الشعبي الوحيد اللي شغال في موسم رأس السنة وحتي أبوالليف ملوش غير نمرة واحدة في فندق السلام مع حماقي إنما أنا هكون في الكونراد مع وائل جسار وفي سميراميس مع نانسي عجرم وفي شيراتون، البرنامج كله هيكون بتاعي وفي صن ست أيضا ودي مش فهلوة مني ده بفضل متاجرتي مع ربنا اللي يجيني من وراها الخير كله. تم تكريمك في مهرجان دبي حدثنا عن ذلك؟ - الحمد لله جو جميل وتكريم أسعدني جدا وهناك احتفلت مع قناة دبي الرياضية باللاعب سعيد العويران صاحب هدف كأس العالم وكنت ضمن لجنة التحكيم في برنامج «سما» وساندت كل المحبطين بسبب أعضاء اللجنة ونجحت كل الناس اللي مخدتش حقها.. وماهي أخبار الألبوم الجديد الخاص بك؟ - انتهيت من 7 أغان منه وتبقي لي ثلاث وسيكون الهيد باسم «مراتي خنقاني» وأتعاون فيه مع محمد يحيي والشاعر محمد عاطف.