صديقي المسطول يسأل سيادة الرئيس مبارك

بالبلدى

· ربنا يرحمك يا علاء أنت وجميع أموات المسلمين
· أسأل سيادة الرئيس سؤالا: انت هتعتزل الملعب إمتي؟!
النهارده 11 فبراير فات سبع سنوات علي رحيل صديقي وحبيبي وحيبب كل الفنانين الراحل علاء ولي الدين.. سبع سنين فاتوا علي موت علاء ولي الدين النجم اللي وجع قلوب الملايين من المصريين عند وفاته..
سبع سنين فاتوا علي موت علاء ولي الدين ولسه عايش في قلوب الملايين ولسه أفلام عايشه وبتضحكنا وبالذات فيلم «الناظر صلاح الدين» اللي مثل فيه علاء شخصية الست وكان من أعظم الادوار التي قدمها علاء ولي الدين في تاريخ السينما المصرية.. ربنا يرحمك ياعلاء انت وجميع أموات المسلمين.
أترك علاء ولي الدين وأذهب إلي صديقي المسطول اللي تابع التغطية الاعلامية الحكومية لفوز مصر بكأس الأمم الافريقية السابعة وخاصة الصحف الحكومية المنافقة للرئيس مبارك وابناء الرئيس مبارك وكمان التليفزيون المصري اللي كان بيذيع الاغاني الوطنية ويظهر فيها الرئيس وأبناؤه كأنهم همه اللي لعبوا وفازوا بالبطولة الافريقية وليس اللاعبون وجهازهم الفني بقيادة الشيخ حسن شحاتة.. وقال لي صديقي المسطول انا عايز اسأل الرئيس سؤال مهم وهوه سيادة الرئيس انت حتعتزل الملعب السياسي امتي؟ سيادة الرئيس انت حكمتنا بالصدفة ياتري برضه حتسبنا بقانون الصدفة؟ ويواصل صديقي المسطول كلامه قائلا لسيادة الرئيس: لما سيادتك انت وولادك فرحانين قوي ببطولات وانجازات الكرةالمصرية والاعلام الحكومي بينسب الانجاز ليكم ياتري ما سألتوش نفسكم ليه مصر ناجحة في الكورة وفاشلة في كل المجالات التانية.
الهواء ملوث والميه فيها مجاري والزراعة مسرطنة وأمثله تانية كتير كل الناس عرفاها وعيشاها أكتر مني؟!