يارب ارحم أم علاء ولي الدين

بالبلدى

· وكانت عمالة تنادي علي أولادها اللي ماتوا وهمه علاء وخالد وزوجتة هبة
· ويارب اجعل أم علاء ولي الدين في جنتك مع نساء العالمين المكرمات
سبحان الله قدر غريب وعجيب اللي بيحصل لأسرة الفنان الراحل علاء ولي الدين اللي مات من سبع سنين وفي نفس الشهر اللي مات فيه من سبع سنين وهو شهر فبراير ماتت والدته الحاجة الصابرة بهيه حسن هذه الست المؤمنة الصابرة ربنا ابتلاها بموت أولادها في حياتها فحمدت ربها
وبعد كده ربنا ابتلاها بمرض السرطان وبرضه كانت ساجدة وشاكرة لربنا سبحانه وتعالي وقبل إصابتها بالغيبوبة في الأيام الماضية. رحت زرتها بالمستشفي واحنا قاعدين أنا والحاجة أم علاء ولي الدين وابنها معتز والشيخ ثروت ابن خالة علاء.. وإحنا قاعدين نظرت لي الحاجة وقالت لي وللشيخ ثروت ابقوا خالوا بالكوا من معتز مالوش غيركم بعد ربنا
أنا خلاص حأروح لحبايبي أولادي علاء وخالد ويوم الاثنين اللي فات قبل وفاة أم علاء ولي الدين كانت في غرفة العناية المركزة وغائبة عن الوعي وكانت عمالة تنادي علي أولادها اللي ماتوا وهمه علاء وخالد وزوجتة هبة المدفونين في مقبرة واحدة واللي سابوا ابنهم يوسف اللي عنده سبع سنين علشان جدته تربيه ولكن القدر كان متربصا بالحاجة أم علاء ولي الدين.. ماتت أم علاء ولي الدين اللي باعتبرها آية لكل الصابرين في اللي حصلها ولأولادها واللي حصلهم ده موعظة من ربنا سبحانه وتعالي.
ويارب اجعل أم علاء ولي الدين في جنتك مع نساء العالمين المكرمات وهم كالسيدة خديجة زوجة رسول الله عليه الصلاة والسلام واجعلها مع السيدة مريم العذراء عليها وعلي ابنها عيسي ابن مريم السلام وعليهم وعلي نبينا وسيدنا محمد الصلاة والسلام.
يارب ارحم أم علاء ولي الدين ومعها جميع نساء المؤمنين «آمين».