يوسف غالي أكل أموال الشعب

بالبلدى

· إن شاء الله تكمل الفرحة المصرية بالفوز ببطولة الأمم يارب آمين.. يارب.. ده حلم ملايين المصريين
كنت عاوز أواصل حواري مع صديقي المسطول ولكن صديقي المسطول مشغول ببطولة الأمم الأفريقية اللي مصر عملت فيها أرقاما قياسية
وإن شاء الله تكمل الفرحة المصرية بالفوز ببطولة الأمم يارب آمين يارب ده حلم ملايين المصريين وأحب أقول كلمة للشيخ حسن شحاتة يا شيخ حسن أنا بعتذرلك لأني هاجمتك وسخرت منك وانك تعرف شيخ سوداني ويا شيخ حسن يا شحاتة بركاتك انت والشيخ بتاعك.
مش لاقي تعبير اكتبه عن يوسف بطرس غالي غير ان أقول له إنت وزير بتدوس الشعب المصري وبتستغفله وفيه أكتر من دليل علي إن يوسف بطرس غالي وزير أكل أموال الشعب الغلبان الدليل الأول هو إن سيادة الوزير خد فلوس المعاشات والتأمينات بتاعت الناس العواجيز والغلبانة ودخلها في ميزانية الدولة وأنا بشوف ستات ورجالة كبار السن واقفين مستنيين من بعد صلاة الفجر في عز البرد الشديد علشان يقبضوا معاشهم في مكتب بريد حدائق القبة وفي الآخر موظف البريد قال لهم تعالوا الاسبوع القادم لان الفلوس ماجتش وشفت بعيني الناس العواجيز الغلابة وهما بيدعوا ربنا يخرب بيت الحكومة ووزرائها اللي مبيحترموش الشعب اللي بيحكموه وعلي فكرة من أربع سنوات طلع وزير المالية يوسف بطرس غالي مع الإعلامي الكبير محمود سعد في البيت بيتك وقال وزير المالية أنه خلال سنة الناس العواجيز دية حنعملهم كارت فيزا ويصرفوا بيه فلوس معاشاتهم من ماكينة وأنا بسأل وزير المالية ياتري ليه لم يتم تنفيذ كلامك؟ وأنا طبعاً عارف رد الوزير اللي قال إنه يوجد أزمة في الماكينات! يا سيادة الوزير هو لسه في أزمة في الماكينات برضه؟.