محمد فؤاد غاضبا: ماله يعني خريج الصنايع !!

تصريحات مثيرة للنجم محمد فؤاد أثارت مواقع التواصل الاجتماعي خلال الساعات الماضية، تحدث فيها بغضب عن المتنمرين من بدايات الفنانين أو أعمالهم، وقضايا خلافية في الوسط الفني، وأغنيته الجديدة "الحفلة".
وطرح محمد فؤاد أغنية سينجل جديدة بعنوان "فى الحفلة" عبر "يوتيوب" على قناته الرسمية، والأغنية من كلمات دبل زوكش، وألحان علاء فيتى، ومن وجهة نظره هي لون جديد عن أعماله السابقة، غير أنها الأولى لفؤاد في العام الجديد.
في البداية علق فؤاد على الجدل الذي حدث عقب أغنية الحفلة، قائلا إن "اشتغلنا علشان نعمل أغنية جديدة وتشد الناس، البعض له وجهة نظر إنها غير مقبولة وهذا حق الجمهور، وعلى فكرة دا اللي حصل من أيام أغنية كمننا وحيران، وحتى فالسكة فالسكة، أي حاجة جديدة على ودان الناس لازم تخلق جدل، وبعدين أنا واثق من زوق الجمهور".
وأكمل فؤاد في الرد على منتقدي أغنيته الجديدة "مش لازم نمشي على نمط واحد، أو نرضي كل الأزواق، المهم إننا لازم نجدد ونفكر فى اتجاهات مختلفة وندور على أغانى برة الصندوق، أهم أهداف الأغنية هو إخراج الجمهور من حالة الإحباط إلى التفاؤل".
ثم انتقل فؤاد إلى الرد على هجوم الموسيقار حلمى بكر عليه بعد طرحه أغنية "الحفلة"، قائلا "هو أخونا الكبيرة الحقيقة، أنا عارف إن السوشيال ميديا بتلعب دور مش لطيف في الخلافات بالوسط الفني ومش عايزين ننجر ليها، أنا خدام حلمي بكر وخاصة إني عارف عنده ظروف بعد وفاة شقيقه، وبتاع الفيس بوك قاعد في مكان دافي ورا الموبايل وعمال يقطع في الناس، بلاش فتي".
وصرح فؤاد غاضبا "حتى بعد اللي وصل ليه الناس على السوشيال ميديا من التنمر عليه أنا مش بزعل حد وبعرف استخدم لساني كويس، وواحد عقله ما ينفعش كدة بيقولي إني خريج صنايع، يا عم ماله خريج الصنايع، كلنا ناس محترمة هات فؤاد على جنب، ملايين المصريين خريجين صنايع، دا اسمه تهريج وناس بتعمل مشاكل وخلاص".
ويستعد الفنان محمد فؤاد لطرح ألبوم جديد بعد تعطله سنوات وتسريب عدد كبير من الأغاني، لكن الفنان وعد الجمهور بتقديم أغنيات جديدة غير التى تم تسريبها.