ضد المنطق.. تورتة الطلاق

التورتة مظهر من مظاهر الفرح، التورتة عادةً بنشوفها فى الأفراح وأعياد الميلاد وكل أنواع المناسبات السعيدة، لكن هل ممكن يكون فيه تورتة للطلاق؟ آه ممكن طبعاً ليه لا.. زي مافيه تورتة للجواز فيه برضه تورتة للطلاق.. ماهو الموضوع كله مبني أساساً على الإحساس بالفرح.
زي ما إللى بتتجوز بتفرح فبتجيب تورتة وتعمل فرح زي ما إللى بتطلق ممكن تفرح وتجيب تورتة وتعمل فرح، لكن الفرح ده بيختلف من واحدة للثانية يعني فيه إللى بتعمل حفلة على الضيق، وفيه إللى بتحجز قاعة وتعمل فرح كبير زي فرح الجواز بالضبط وفي كلتا الحالتين بيكون ده مبني على الزوج المصون عمل فيها إيه طول فترة الجواز بالإضافة طبعاً للحالة المادية ليها، يعني ممكن يبقى عمل فيها كتير واستحملت أكتر فنفسها تعمل فرح لطلاقها تسمع بيه العالم كله لكنها طلعت من الجوازة على الحميد المجيد وأبيض ياورد بعد ما أخد كل إللى وراها وإللى قدامها فالأسف بتضطرتعمل حاجة كده على الضيق وغالباً بتصورها فيديو وفوتوغرافية وبتنزلها على مواقع التواصل الاجتماعي علشان أكبر عدد من الناس يشوفوه ويشيروه ويكتبوا تعليقات ويعملوا لايكات، طبعاً ده كله بيوصل للزوج المصون بعد ما بيأخد لفته على مواقع التواصل الإجتماعي فبيشوف الناس وهي بتدعي أو بتتريق عليه وبيشوف كمان فرحتها بطلاقها الواضحة من رقصها وتنطيطتها إللى بتعكس مدي سعادتها.
كل ده وطلاق فما بالك بقي لو أتخلع هيكون الوضع إيه؟
تخيل نوعية التعليقات إللى هيشوفها مكتوبه عليه، غالباً هتكون كلها من نوعية "أخيراً خلعتيه داهيه لا ترجعه"، "ماهو لو كان عدل وأحترم نفسه وبطل بصبصه وفراغة عين ماكانش وصل بيه الحال إنه يتخلع بس هنقول إيه عالم ناقصه مايملاش عنيهم إلا التراب".
ده غير صحباتها وأخواتها لما يقرروا ينتقموا منه أكتر فيطلعوا صورة ليه ويكتبوا عليها "المخلوع" ويحطوها مع صور حفل الطلاق في بوست وفجأة يتحول البوست ده لتريند من كم الشير الرهيب إللى أتعمله.
كل ده نوع من أنواع التجريس والشرشحه للزوج المصون يعني على قد ما عملت فيا هعمل فيك أضعاف مُضاعفة وهخلي إسمك على كل لسان وزي ما قهرتني وتعبتني وذلتني وكسرتني هكسرك ومش هخليك ترفع رأسك وسط الناس من كتر الفضايح إللى هتتفضحها وهحسسك وكأنك راكب حمار بالعكس وسط شوارع المحروسة والناس بتزفك بالطبل والزمر وبتقول " من ده بكره بقرشين".
ماتستغربوش كلامي وفكروا فيه بالمنطق ...أكبر فرحه بيفرحها الإنسان لما ربنا يبعد عنه المصايب، فرحته إن فيه مصيبه سوده ومهببه إنزاحت من علي كتافه بتكون أكبر بكتير من فرحته إن فيه سعادة جياله وأكبر دليل على كلامي جُمل الفلكلور الشعبي "ربنا يفرحكِ بطلاقك" "ربنا يفرحك بطلاق أمك" الناس دي مش بتهزر الناس دي بتتكلم بجد جدا الطلاق زي الجواز ليه فرحتة ورونقه.
لما يكون أختيارك أسود ومهبب يبقى طلاقك فرحة ورحمه.. بُعد المصائب عنك دي قمة السعادة علشان كده ممكن تلاقي واحدة أطلقت وواقفه تزغرد، وفيه إللي بترقص، وفيه إللي سجدت ركعتين شكر لله، وفيه إللي دبحت عجل ووزعته لله، وفيه إللي عملت فرح للطلاق وتورته كمان.
هتقولوا الحريم مجانين هقولكم لا مش مجانين، أي واحدة ممكن تكون مخدوعة في إللي كانت بتحبه، بتصهين كتيرعلشان المركب تمشي وأستحملت فوق طاقتها وقالت يمكن يتعدل ويتصلح حاله إنما في الآخر عرفت إن المثل إللي بيقول "عدلتك ماتتعدل والطبع فيك غالب وديل الكلب عمره مايتعدل ولو علقوا فيه قالب " مثل صحيح 100% فعرفت إن إللي استحملته معاه سواء لإنها كانت مخدوعة فيه وبتحبه أو علشان العيال أو علشان أي سبب أيا كان مايستاهلش إنها تعيش تعيسه مكسوره مقهورة فلما قدرت تخلع منه وتطلق وترميه من حياتها كان بنسبالها ده قمة السعادة .. قمة الفرح.. قمة الراحة النفسية وعليه عملت تورتة لطلاقها وأحتفلت باليوم السعيد ده.
إللى يقول الحريم مجانين قوله همه فعلاً مجانين لإنهم بيسكتوا ويستحملوا ويصهينوا فالطرف التاني بيفتكرده ضعف وخضوع وأستسلام مايعرفش إن الست ممكن تسامح وتتنازل لكنها مابتنساش وفجأة بتقرر تبيع فبتتنازل عنه هو شخصياً وترميه من حياتها من غير مايطرف لها عين.
الست قوية وأقوي من أي راجل ويوم مابتبيع بتبيع ومش بتبص وراها تاني وإللى يقول عكس ده يبقى ضد المنطق.