Over qualified ضد المنطق

(Over qualified) جملة أكيد سمعتها قبل كده وأنت بتعمل (interview) لوظيفة قدمت عليها، يمكن الجملة دي تكون سمعتها مرة أو أكتر من مرة دي حاجة أنت ونصيبك بقى.

الغريب أنك لما بتسمع الجملة دي في نهاية ال(interview) بتبقى مش عارف المفروض وأنت خارج تضحك ولا تعيط.

تضحك أنك على قدر عالى من العلم والخبرة اللي تؤهلك لوظيفة أعلى وأفضل من الوظيفة اللب أتقدمتلها، ولا تعيط أن الخبير إللى عمل ال(interview) شايف انك أعلى من الوظيفة المطلوبة فمع ألف سلامة ياسيد ماتلزمناش ورينا عرض كتافك.

اللي هيجنني فعلاً إزاي وسط الظروف دي كلها إللى بيعمل ال(interview) بيبص أنت هتاخد كام مش هتفيد الشركة أو المؤسسة بإيه.

يعني مثلاً لو أنت موافق إنك تشتغل بمرتب أقل من المرتب اللي يتناسب مع خبراتك ومؤهلاتك وقابل وحابب تقدم خبراتك للنهوض بالشركة ولا المؤسسة دي فتلاقي اللي يقولك لا يافندم خبراتك ومؤهلاتهم أعلى من انك تمسك الوظيفة دي وأنا ماقدرش أديك مرتب قليل بالشكل ده، طب صاحب الشأن موافق، برضه يقولك لا أنا عايز واحد خبراته على قد الوظيفه دي مش أعلى منها.

اللي مش قادرة أفهمه وشيفاه حاجة غير طبيعية بالمرة إزاي جملة زي دي تتقال، الطبيعي، أن ممكن يتقالك خبراتك أقل من الوظيفة اللى حضرتك متقدملها إنما خبراتك أعلى وأكبر من الوظيفة فدي حاجة جديدة ومافيش أي عقل يتقبلها بصراحة.

علشان كده قعدت أفكر كتير ليه الجملة دي بتتقال وأيه الهدف منها ولقتها بتنحصر في حاجه من التالي:-

أولاً:
السيد الفاضل إللى بيعمل ال(interview) عنده عقم فكري وتحجر فى تلافيف المخ وواضح أنه لا بيفهم ولا عايز يفهم ولا فيه أمل أساساً أنه ممكن يفهم

جاله فرصة ذهبية إن واحد خبراته ومؤهلاته أعلى يشتغل في الشركة وبمرتب أقل ما يستحق بس سيادته طور بدماغ تيس ورأسه وألف صرمة قديمة مش عايزة وعايز الضعيف أبو جوز جنيهات

ثانياً :
الأستاذ المُبجل المحترم اللى بيعمل ال(interview) منفسن وخايف انك لو أشتغلت تأخد وظيفته وده لأن خبراتك ومؤهلاتك أعلى منه ويؤهلك فعلاً انك تمسك وظيفته أو وظيفة أعلى منه وهو مرعوب من ده فطبيعي جداً يحطلك قشرة موزة تتزحلق عليها وتترمي بره الشركة.

طبعاً الأستاذ ده حمار وحط تحت حمار دي مليار خط لأن كل واحد رزقه مكتوب وماحدش بيأخد رزق حد بس لأنه هو شخصياً عنده إستعداد يأخد وظيفة أي حد فمُتخيل أن كل الناس زيه فبيحاول يحافظ على مكانه في الشركة على قد ما يقدر وأي حد كويس بيرميه بره بعد ما بيديله الزُنب والخوازيق التمام.

ثالثًا:
الأستاذ عنده عقد وكلاكيع نفسيه وعايز يجيب حد ضعيف يتحكم فيه ويبهدله في الرايحه والجاية يعني الموضوع عنده مش موضوع شغل على قد ماهو موضوع تطليع كلاكيعه وعقده النفسية على الموظفين اللي.. لا ليهم حول ولا قوة

رابعًا:
ده مجرد تمثيلية بتتعمل بإتقان (interview) الأعلان محجوز لحد تاني ال قدام الناس كلها لحد مايجي الأستاذ اللى عليه العين واللى متفق عليه من بدري وإللي هيحصل على الوظيفة دي مقابل واسطه أو رشوة يعنى من الآخر مش مُقابل الخبرة.

لما تلاقي اللي عايز يشتغل وعنده خبره تُؤهله للشغل مش لاقي شغل.. ولما تلاقي اللي شغال ماعندوش خبره تساوي الشغل اللي بيشتغله لأنه أشتغل بالواسطة أو بالرشوة يبقي هو ده اللي ضد المنطق.