خبط بالعقل.. ل«مخابرات قطر»: أبعدوا عن «اليوم السابع» أصلهم صعايدة.. 70 ألف دولار سبب ظهور محمود حميدة بالبوكسر مع رامز.. أرقص وهيص «الزومبا» هتخلي صحتك تمام.. وزيادة المعاشات 130جنيها «ربنا يخلي الحكومة»

70 ألف دولار سبب ظهور محمود حميد بالبوكسر في برنامج رامز
البوكسر والسحلية دونت ميكس.. هل الفلوس ممكن تغير مبادئ الشخص؟.. سؤال أنا بصراحة عارفه إجابته وأهمها أن الحوجة من أسباب عمل حاجات منتخيلش أننا نعملها.. بس الفنان القدير محمود حميد مش محتاج ولا حاجة عشان يوافق على عرض حلقته في برنامج رامز جلال.. آه صح المبلغ 70 ألأف دولار -والله أنا لو مكانه هوافق دول 70 ألف دولار- بس ياريتها جات على موافقته على عرض الحلقة.. دة كمان هيظهر بالبوكسر.. ياسنة سوخة يا أولاد.. في جميع الأحوال نقدرك يا أستاذ محمود وننتظر عرض حلقتك.. بس أقنعوك أزاي؟؟.
زيادة المعاش 15%.. يعني هنجيب كيلو لحمة ربنا يخلي لينا الحكومة
وأخيرا زيادة في المعاش ربنا يخليكي لينا يا حكومة.. قولي صحيح الزيادة دية قد أيه؟.. 15%.. بجد يعني يطلعوا كام يعني. يعني هتزيد تقريبا 130 جنية.. بس؟ .. آه.. يلا قشطة هنجيب كيلو لحمة بقي بالزيادة دية وتبقى جبرت والحمد لله..
إنهاردة قالت الدكتورة غادة والي وزيرة التضامن الاجتماعي إن الحكومة وافقت، اليوم الإثنين، على الزيادة السنوية للمعاشات بنسبة 15%، بحد أدنى 130 جنيهًا.. بس خلاص.. وشكرا أوي وخالص.
أبعدوا عن اليوم السابع يا مخابرات قطر لأنهم صعايدة
شكلهم ميعرفوش إن اليوم السابع زي الصعايدة.. بيتجوزوا من بعض وبيدافعوا عن بعض.. عارف المثل بتاع «أنا وأخويا على أبن عمي، وأنا وأبن عمي على الغريب»، هو دة سلو مؤسسة «اليوم السابع» من رئيس التحرير لحد عمال البوفية.. إيه بقي مناسبة الكلام دة؟.. من شوية كدة لاقينا أستاذ خالد صلاح، بيفضح مخابرات قطر علي تويتر. وقال: «فاشلون حتى في فبركة إيميل ضد اليوم السابع.. حقدكم على الإمارات لا يمكن إخفاؤه.. وخوفكم من قوة معلوماتنا وملياراتكم فشلت أمام صحف مصر.. دة معناه أن مخابرات قطر عملت إيميل كذب (لليوم السابع)، وكمان بتبعت مراسلات شغل.. قال يعني عشان الدور يتسبك.. بس المصيبة بقي إن اليوم السابع إيميله مش (gmail)».. ودة بيأكد إن الهرتلة ضد مؤسسة صحفية بتثبت ضآلة قطر ومن الأخر دة بيثبت إنكم خونة والإمارات شرفاء ويا أهلا بالمعارك.
فوقان وزارة التربية والتعليم بعد تدخل البرلمان لمحاربة «شاومينج»
وبعد طول غياب وانتظار تم بحمد لله فوقان وزارة التربية والتعليم وإعلان الحرب على «شاومينج».. بس اللي ساعد في دة مين نائب وإحنا كلنا عارفين إن بدخول البرلمان إحنا بنحس بالأمان ويستعد البرلمان لإقامة قانون لمكافحة الإخلال بالامتحانات وذلك لمواجهة محاولات تسريب الامتحانات بعقوبات كبيرة حبيتين توصل للحبس من سنتين ل 7 سنوات وغرامة تصل ل 300 ألف.. وبكدة «شاومينج» مش هيصعب عليه طلاب الثانوية العامة والإعدادية وكمان العفريت إللي عليه هيصرفوا.. أصلوا مضر يعمل كدة دة حبس وغرامة كبيرة أوي.. مش كدة ولا إيه.
رجال مبارك هما من تعدوا علي أراضي الدولة بس مصر مش طابونة
«مصر مش طابونة».. كلمة فيها الكثير من المعاني المحيرة ولكن الأرجح فيها أنها تدل علي العزة والكرامة.. أصل إللي قالها الرئيس السيسي مش أنا.. ودة كان رد على الأشخاص المعتدين على أراضي الدولة وحث جهات الدولة للتحرك والتصدي لكل حالات التعدي علي أراضي الدولة.. وبفضل الله عرفنا أن أباطرة رجال مبارك هما اللي اخدوا أراضي الدولة «قال يعني مكناش نعرف أنهم اللي وخدنها».. بس السيسي سحب الأراضي والحمد لله رجعت للدولة تاني.. وتوتة توتة خلصت الحدوته حلو ولا؟؟.
أمريكا تسحب قواعدها من قطر وهتفرض عقوبات إقتصادية عليها
شكلها ولعت والدنيا هتخرب أكتر ما هي خربانة.. كشف موقع «نيوز وان»، الإسرائيلي النقاب عن أن الرئيس الأمريكي، يعتزم لنقل القاعدة الأمريكية الموجودة بقطر إلى دولة خليجية أخرى «ياتري مين؟».. ويفرض عقوبات اقتصادية عليها لدعمها للإرهاب فى منطقة الشرق الأوسط.. عقوبات اقتصادية ونقل القاعدة الأمريكية دة إزاي دة؟.. طب فكر معايا كدة لو الغضب بتاع أمريكا حل علي قطر.. هل هتفضل قطر غنية ومتطورة وشيك وحلوة وموز؟.. ولا هيروح عليها؟.. شكلها هتروح عليك يا حلوة.
خالد النبوي رغم تعبه الشديد ومنعه من الحركة إلا أنه يصور مسلسله «واحة الغروب»
حب الشغل ميوقفوش تعب.. رغم إصابته الخطيرة خالد النبوي في سقارة لتصوير مسلسله الذي يعرض في رمضان «واحة الغروب».. وده طبعا ض رغبة الدكتور لأنه ممنوع من الشغل أصلا.. بس حب الشغل والوقوف قدام الكاميرا ميقدرش يقف قدامه أي تعب.. ألف سلامة عليك يا نبوي ألف مبروك على المسلسل الرائع.
«الزومبا» هتخلي صحتك تمام أرقصها وعاليها
نصيحة على الماشي.. للخسسان وتنسيق الجسم وشده وتحسين صحة القلب والأوعية الدموية والتخلص من التوتر والقلق الإكتئا.. وأخر حاجة بقي للشعور بالثقة بالنفس والسعادة.. أرقص «زومبا» مرة في الأسبوع وأنت هتبقي تمام.. أقعدوا بالعافية.
اقرأ أيضا
خبط بالعقل.. فيفي عبدو بعد ال5 مواه بقت 64 تيت مع رامز جلال.. مفيش فرق بين مسلم ومسيحي.. مسلم عمل عمرة لشهداء حادث المنيا.. دار الإفتاء حسمت «بوس» الزوج لزوجته وقالت مبيفطرش في رمضان.. نام عريان عشان صحتك
خبط بالعقل.. ارفع رأسك فوق أنت مصري.. السيسي يعيد للمصري جبروتة وقوته.. الحقي يا حكومة الكارثة محافظ الجيزة باع الناس وبيعرض حياة 50 أسرة للموت.. ابعد عن السوشيال ميديا وغني لها عشان ولادك ميجلهمش توحد
خبط بالعقل.. برومو رامز جلال يقلب اليوتيوب.. قضية خالد علي طلعت جد مش هزار.. أما مرات ترامب لبست الحجاب بالفاتيكان احتراما للبابا بس ملبستوش بالسعودية ده معناه إيه؟ العثور على سفينة نوح هي كانت تايهة ولا إيه؟
خبط بالعقل.. «تميم» و«قنا».. ايه اللي جاب القلعة جنب البحر.. فيها اللي مكفيها «مصر مبتبصش في شئون حد»..المتحدث العسكري بيحب مراته «كفاية قر».. سرقة كابلات الحي الراقي «الدنيا اتقل خيرها».. قادر يا حضري

خبط بالعقل.. السيسي: «أقسم بالله طول مانا عايش مش هسيب حد ياخد حاجة مش بتاعته».. ل«داعش»: «إنتم دين أبوكم أيه؟».. بطيخ وخوخ وكانتلوب مسرطن في الأسواق.. ترامب بيترفعلوا الشبشب زي الرجالة المصرية