مختار نوح عن يوسف زيدان: «أجندة الجزيرة مفيهاش صلاح الدين وتنزل المرة دي»

انتقد المحامي المعروف مختار نوح، الجماعات السلفية، وتغاضيها عن توجيه اللوم أو مهاجمة تصريحات الكاتب يوسف زيدان، المسيئة للناصر صلاح الدين، ووصفه له أنه أحقر شخصية في التاريخ.

وكتب نوح، على صفحته الشخصية على موقع التواصل الاجتماعي «فيس بوك»، قائلا « كاتب تعرض لصلاح الدين الأيوبي بكلام غير لائق ويصفه بأوصاف دنيئة.. وده مش موضوعنا الآن لكن موضوعنا إن مافيش سلفي واحد من بتوع حذاري من التهاني للمسيحيين لأنها إثم حتى شوف الأدلة كتيرة وأكتر من الأرز وفي كل عيد أوعى التهنئة...حذاري من التهنئة...أوعى الجاز...حذاري يطلعلك حبوب المسيحيين لكن ماحدش منهم فتح بقه علي يوسف زيدان لأن يوسف زيدان مش في الجدول واهانته لصلاح الدين الأيوبي لا تثير فتنة طائفية ولا تغضب».

وتابع « مع إن صلاح الدين الأيوبي ولي نعمة السلفيين بل سبب وجودهم والإخوان المسلمين كمان والله.. وهو الذي حول الأزهر من شيعي إلى سني وهو اللي فرض المذاهب الأربعة في الأزهر...ومع ذلك لإن اللي عمله صلاح الدين ليس في أجندة قطر فلا مانع تنزل المرة دي».

وقال « طبعا حبيت افتن على يوسف زيدان فاتصلت بأحد المشايخ ومن الكبار قوي ومن اللي بيظهر في اكثر من برنامج وفتنت على يوسف زيدان لقيت إجابته غريبة وكلها عقل وبيقوللي {يعني صلاح الدين الأيوبي ده من الصحابة؟!} وحاولت انرفزه ولكن أبدا فحدثتني نفسي أن افتن علي يوسف زيدان عند أي حد من بتوع الأزهر لإنهم لا تأخذهم في الحق لومة لائم كما أن المذاهب بما فيها المذهب الأشعري عقيدة الأزهر يرجع الفضل في انتشارهم إلى صلاح الدين الأيوبي...وبلاش نتكلم زي يوسف شاهين ونقول إن صلاح الدين الأيوبي هزم الفرنجة وهزم ريتشارد قلب الأسد الذي كان يأكل خروفين على الغذاء وخروفين علي العشاء وجدت صديقي الأزهري يقول لي{ بلاش نثير فتنة} فقلت أمال إيه حكاية الفتن اللي شغالة ولما ننبه حد يقولك {اكفر بقى بكلام ربنا....قرآن ده واللا مش قرآن....أنت فتنت يا أخ مختار...ربنا يهديك ....دا أنت اللي كنت زمان بتدرس لنا ...إيه اللي جرالك}.
وتابع: «ألم أقل لكم يوسف زيدان ليس في الجدول، فلن تدافع الجزيرة عن الأزهر ولن تتعرض للكاتب يوسف زيدان لإنهم شايلينه لوقت عوزه ولن يعترض الإخوان ولا الأزهر ولا السلفيون..لإن الأجندة فيها فتنة بين مصري مسيحي ومصري مسلم ومافيهاش ل ازينب ولا يوسف زيدان ولذلك استمع الجميع إلى يوسف زيدان وهو ينهال بالسباب علي صلاح الدين الأيوبي وقالوا جميعا {خلااااص تنزل المره دي}».