«بطلة معاقة تتحدى الإحباط».. تفاصيل مكالمة أحمد السقا لفتاة تحلم بمحادثته

«بطلة معاقة تتحدى الإحباط..تسعى لتحطيم المستحيل.. مصورة الأهلى بالمستقبل.. إنها أنا يا سادة».. هكذا أطلقت الفتاة غادة رجب على نفسها في سيرتها الذاتية بحسابها الشخصي على موقع «فيس بوك»، وهي الفتاة التي أعلنت على حسابها تلقيها مكالمة من النجم أحمد السقا لدعمها، بعدما أعلنت علن رغبتها من قبل في التحدث معه.
قالت غادة في منشورها: «يا ناس، أحمد السقا كلمني، مش قادرة أصدق نفسي أقسم بالله إنسان في منتهى الذوق والرقي والاحترام والتواضع حاجة مبهجة بجد»، تم نقلت لمتابعيها تفاصيل المكالمة: السقا: السلام عليكم ازيك يا غادة عاملة أيه
غادة: تمام جدا حضرتك بس مين معايا معلش
السقا: أنا أحمد السقا
غادة: بجد
السقا: أيوه والله ومبسوط جدًا إني بسمع صوتك والله وإني بطمن عليكي ودوختينى جدا على رقمك على فكرة
غادة: أقسم بالله أنا الأسعد بصوتك ودي حاجة تشرفني جدًا بجد، والله ما مصدقة نفسى
السقا: عايزينك تجمدى كده وبأذن الله ربنا هيشفيكى يا قمر وتقوميلنا بالسلامة يا رب
غادة: اللهم أمين يا رب ربنا يسمع منك هو ممكن أبقى أتواصل معاك على الواتس بعد كده
السقا: أيوه طبعًا اكيد دى حاجة هتشرفنى والله واؤمرى لو عايزة أي حاجة والله
Capture

لم تكن هذه مجرد محادثة بين فنان وأحد معجبيه، بل تكاد تكون إحدى طرق علاج لهذه الفتاة التي تعاني من مرض نادر كما وصفته هي، ورفع روحها المعنوية التي تواجه أزمة المرض، إذ جاء في منشور لها قبل مكالمة أحمد السقا بيومين ما يلي: «عدى 58 يومًا على خروجي من المستشفى ولسه مفيييش أخبار! اتصلت بالدكاترة انهارده للمرة الأخيرة وبردوه مفيش أخبار! هل لو حد مكانى دلوقتى هيبقى رد فعله ايه وهو كل يوم حالته تسوء اكتر!.
وتابعت أرجوكم مش عايزة حد يقولي اصبرى وتفاءلى واننا بنتعلم منك القوة ..أنا إنسانة.. إنسانة ضعيفة جدًا ومريضة ومش قوية خالص كل اللى قدرت أعمله انى حولت الوجع لابتسامة أمل وبس، أنا أقسم بالله ليا علاج بجد وتم اثبات ده فى الحلقة اللى ظهرت فيها وبأسامى الدكاترة، إيه سبب التأخير ده كله، أنا بجد معدتش عارفة أعمل إيه ولا حتى أفكر.. صبرنى يا رب، لكن أنا اقسم بالله ما هسكت عن حقى فى علاجى ومش هسيبه، سامحونى لو حد بعت رسايل وانا مردتش بس انا بجد مش هقدر اكلم حد ومش عايزة حد ينتقد كلامى وان ازاى اقول كده لان جوايا كمية غضب شديدة وربنا ما يوريكم كسرة خاطر حد كل امنيته علاج بس.
Capture1