رد نارى من شقيقة مراسل «أبلة فاهيتا» على بيان «سى بى سى»

هاجمت رولا حسين شقيقة شادي، مراسل برنامج "أبلة فاهيتا"، أسرة البرنامج الذي يذاع على قناة "CBC"، بعدما نفت صلتها بفيديو تهنئة الشرطة ب"الواقي الذكري".
وقالت عبر صفحتها على «فيسبوك»: "كلمتين "لبعض من أسرة برنامج أبلة فاهيتا والشركة المنتجة إنتو عارفين إن شادي كان بيعتبركم من عيلته لما كان بيتكلم عنكم؟ أكيد كان قصده على شوية ناس جوه اللي هما فعلا بيسألوا عنه دلوقتي ومتضامنين معاه، إنتو عارفين إن شادي مؤخرا كان شبه مختفي عن أصحابه وأهله عشان شغله معاكم لوقت متأخر ومشاركته بنفسه في كل خطوة في تقريره من الفكرة للمونتاج لحد ما يخرج التقرير في شكله النهائي اللي بيجيب أعلى نسبة مشاهدة على cbc عامة مش على فقرات البرنامج بس؟".
وأضافت: "إنتو عارفين إن في ناس ابتدت تتفرج عليكم بس عشان تقارير شادي؟ فاكرين لما إنتو اللي كلمتوه وعرضتوا عليه يشتغل معاكم لما لقيتوه بيعمل تقارير لوحده وناجح فيها من قبل مايعرفكم؟ مش كان عاجبكم خفة دمه؟ كنتم فاكرينه بيضحك الناس وخلاص وهو كان بيوصل فكرة معينة.. شادي بتاع الكوميديا السودا اللي بيضحك بس بدموع.. شادي اللي عمل قيمة لبرنامج الناس كانت بتستخف بيه".
وتابعت: "حقكم تعلنوا إنكم مش مسئولين عن اللي بيعمله ولا حتى متضامنين معاه، هو راجل شجاع وقلبه ميت وعنده أحلام فا مش أي حد مطالب يدعمه أو يتضامن معاه كنتم هتبقوا محترمين وهنقدركم أكتر لو اكتفيتم بأنكم تقولوا أن الفيديو مش خاص للبرنامج وإن دي حاجة شخصية وبس كده، بس لما تيجي منكم أنتم إنكم أصلا رافضين آخر فيديو ليه عشان فيه لا مؤاخذة "إساءات ومحتوى مسيء ينافي الآداب والأخلاقيات العامة ولا يتحلى بالمسئولية والاحترام"!! بعتوا الولد علطول كده! أنتم مدركين إن معظم الناس بتكرهكم واللي كانوا بيحبوكوا أنتم خسرتوهم بالبيان ده! وعلى رأي باسم يوسف "اخص على قلة الأصل"".