حكومة جوز الإتنين

الشعب المصري زي الفريك ما يحبش شريك سابق حكومته .. طموحه معدي فكر حكومته .. فراسته أعلي بكثير من قرارات حكومته .. صابر ولكن فاهم .. هارش بس مكبر .. بيدي مش فرصة قول عشرة .. ولكنه زهق من تكرار الفشل .. مل من تغيير الوجوه وعدم تغيير حاله لم يفقد كل الأمل ولكنه فقد أجزاء كثيرة منه .
ماذا تريد الحكومة من شعب لم يلتزم ولم يحترم من قبل حكومة مثل الآن .. أقعدوا في البيت حاضر .. ناموا بدري عيوني .. مفيش مردود إقتصادي هيبان دلوقتي ياسيدي ولا يهمك لو عايز انت خد .. ترقيع دستور رقع المهم ما تكررش أخطاءنا .. انزلوا أيدوا محاربتنا للإرهاب من النجمة احنا في الشارع .. اتبرعوا لدعم مصر من بكرا الصمح هنبيع عفش البيت بس وحياة أبوكم خلصونا .
· يوم ورا يوم نكتشف ان الحكومة مش متجوزانا احنا بس واكتشفنا ونحن غالبية الشعب المصري اننا الزوجة الثانية وأن الزوجة الأولي للحكومة متغيرة فأوقات تكون إخوان وأوقات السلفيين وأوقات الطابور الخامس وأوقات كثيرة تكون المجتمع الدولي (بالقوي) ، يعني بالبلدي كدا اكتشفنا إن حكومة الببلاوي هي حكومة جوز الإتنين وعمرها ما هترضي الإتنين وهتفضل فاضية ومشغولة وهتاكل نص بطن عند الأولى ونص بطن عند التانية وهتمثل علي الأولى وهتحاول تقنع التانية إنها الحب الحقيقي وبعدين تروح تبات عند الأولى وتقولها إنتي أم العيال وهتبقي حكومة بكرش لأنها بتاكل 6 وجبات في اليوم منهم 3 وجبات غصب وإقتدار وهتبقي حكومة مرهقة لأنها عايزة ترضي الضرتين ومش عن إقتناع ولكن عن محاولة لترييح دماغها ، وتتحرق فوفة أكتر ما هي محروقة.
· الإخوان عند الزوجة التانية محظورة وعند الزوجة الأولي فصيل وطني .. ومين قال محظورة نمشيها محصورة .
· الحد الأدني هيرضي زوجة ومفيش حد أقصي عشان الزوجة التانية تعيش وتعيشنا معاها.
· تسعيرة جبرية عشان أم العيال وولعها ولعها من الناحية التانية عشان الحب الحب والشوق الشوق.
· هتنزل تروح شغلك في 3 ساعات وترجع في 3 ساعات وتشتغل 3 ساعات بس ياريت تزود الإنتاج علشان ترضي الزوجتين وتكيد العزال.
· مشاركة شبابية ودعوة للإبداع .. ده كلام الحكومة للزوجة التانية والواقع اللي يرضي الزوجة الأولي إنه ما زال عواجيز كل فرح عندهم طموح والشباب ماسك الهوا باديه .
· يا حكومة جوز الإتنين لما تيجي تجاملي جاملي في فرح بنت أختك وارحمونا من الكوتة والمناب والمؤتمرات والتصريحات واللقاءات والإجتماعات والأفراح والولائم والطهور والفضاحيات والتبريرات والتجديدات .. والله مانعرف عندكم وقت منين تشتغلوا بزمتين أعتقد انه في المستقبل القريب ما سيطلبه شعب اتلسع في كل حتة في جسمه حكومة عالدواق .