السيسي للأقباط في عيد الميلاد:مش هننسى أبدا لكم ولا لقداسة البابا الموقف الوطني المشرف العظيم

الرئيس يزور الكاتدرائية للعام الثاني ويعد بترميم الكنائس المحترقة في عنف ما بعد 3 يوليو
"لا ظروفنا الاقتصادية ولا السياسية ممكن تأذينا إلا أن احنا نختلف"
"التنوع والاختلاف من سنن الله ومحدش قدر ولاهيقدر يخلي الناس حاجة واحدة"
"تحيا مصر بأهل مصر مش بالسيسي"
للعام الثاني على التوالي، شارك الرئيس عبد الفتاح السيسي مساء أمس، في احتفال أقباط مصر بعيد ميلاد السيد المسيح عليه السلام، بمقر الكاتدرائية المرقسية بالعباسية، وسط ترحيب كبير من المشاركين الذين استقبلوه بالتصفيق وهتافات التأييد.
ووعد السيسي في كلمة استغرقت نحو عشرين دقيقة، المحتفلين باستكمال إصلاح كافة الكنائس التي طالتها أعمال عنف وحرق في الفترة التي أعقبت عزل الرئيس الإخواني محمد مرسي من حكم البلاد، خلال العام الجاري.
وبدا الرئيس في حالة ابتهاج واضحة، إذ علا وجهه الابتسام معظم وقت إلقاء كلمته التي أكد فيها على ضرورة وحدة المصريين والإيمان بالتنوع والاختلاف بين البشر.
وقال السيسي موجها خطابه إلى الحضور :" كل سنة وانتوا طيبين جميعا .. أنا مش عايز أعطلكم عشان قداسة البابا ميزعلش .. اسمحوا لي أقولكم كلمتين .. أوجه لكم جميعا التحية والتقدير والاحترام اسمحوا لي أهنئكم كل عام وأنتم بخير".
وقاطع بعض المحتفلين السيسي بهتاف " بنحبك يا سيسي "، فرد قائلا :" واحنا بنحبكم جدا جدا .. عايزين نحب بعضنا بجد ونحترم بعضنا بجد .. كل سنة وانتوا طيبين".
وأضاف :" عايز أوصيكم وكل المصريين بالمناسبة ديا .. شوفوا ومن فضلكم توقفوا قدام كلامي كويس محدش أبدا يفرق بينا .. ده مهم جدا .. الموضوع مهم أوي .. مش أنا أعمله بس ده نعمله كلنا .. كلنا لازم نرجع مش زي زمان .. أكتر".
وهتف الحضور مرة أخرى، فرد السيسي :" يارب يديم الحب ".
وتابع الرئيس :" عايز أوصيكم وأوصي نفسي وكل الموجودين معانا هنا .. شوفوا تاني مفيش حاجة تأذينا لا ظروفنا الاقتصادية ولا ظروفنا السياسية ولا أي حاجة .. أي حاجة ممكن نقدر عليها إلا أن احنا نختلف .. ربنا سبحانه وتعالي سننه في الوجود التنوع والاختلاف، مفيش حاجة واحدة غيره هوا، ربنا خلقنا مختلفين أديان أشكال ألوان لغات عادات تقاليد، كل حاجة، محدش يقدر يخلي الناس حاجة واحدة .. محدش لاقدر قبل كدة ولا يقدر بعد كدة يخلي الناس حاجة واحدة".
وقاطع بعض المحتفلين الرئيس مرة أخرى بالقول :" كل سنة وانت طيب يا ريس"، فأجابهم " كل سنة وانتوا طيبين".
وزاد :" خلوني أقول الكلمتين اللي نفسهم أقولهم لكم .. احنا في مصر اللي علمت على الاف السنين البشرية والحضارة، بتعلم دلوقتي بتقول للناس تعالوا انتوا بتعملوا ايه بتقول للدنيا كلها، بعد ما الدنيا كلها تسمعنا وبعدين تنفذ اللي عرفته مننا وبعدين ده يتحول لعادات وتقاليد ياخد سنين طويلة".
وعلى وقع موجة كبيرة من التصفيق، توقف السيسي عن الكلام وابتسم ضاحكا وقال :" والله يعني خلوني نصقف على طول بقا".
واستطرد :" كنت بتكلم مع أحد المفكرين من كام يوم كدة بقوله من فضلكم عايزين نعمل كتاب أو حكتب، نعلم الناس ان الدنيا مش زي بعضها من أول ولادنا الصغيرين في المدارس لغاية اللي في الجامعة واقبل ده بحب لأن ربنا خلقنا كدة، النقطة التانية لو احنا عملنا ده هندي المثل والنموذج للمحبة الحقيقية بين الناس وبعضها البعض ومفيش حاجة تألمنا ولا تعذبنا أبدا".
وهتف بعض الحضور " تحيا مصر"، فرد السيسي " تحيا مصر بيكم".
وتابع كلمته قائلا :" آخر نقطة هقولهالكم أنا عايز أقولكم، تحيا مصر بأهل مصر مش بالسيسي لأ تحيا مصر بأهل مصر كلها"، وهو ما رد عليه بعض الحاضرين بالصفير والتصفيق، فعلق الرئيس بالقول :" خلاص البابا هيزعل".
وأضاف مخاطبا الحاضرين :" احنا اتأخرنا عليكم في ترميم واصلاح اللي تم احراقه .. اتأخرنا .. ان شاء الله السنة دي كل اللي متأخر هيكون متصلح، واسمحوا لي أقولكم ياريت تقبلوا اعتذارنا في اللي حصل ده، ان شاء الله السنة دي ان شاء الله نكون لو لينا عمر السنة الجاية ميكونش فيه بيت واحد من بيوتكم ولا كنيسة واحدة من كنائسكم الا لما تكون مترممة".
وتابع :" خلوا بالكم ده مش تفضل مننا ده حق واحنا مش هننسى أبدا، اسمعوا طيب، مش هننسى أبدا لكم ولا لقداسة البابا الموقف الوطني المشرف العظيم اللي اتعمل خلال الفترة دي، بشكرك يا قداسة البابا وبشكركم كلكم .. مرة تانية كل سنة وانتوا طيبين وعيد سعيد عليكم وعلينا كلنا والسنة الجاية ان شاء الله خير وسلام وأمن واستقرار بينا كلنا .. تحيا مصر بينا كلنا تحيا مصر بينا كلنا تحيا مصر بينا كلنا كل عام وانتم طيبين".
وأنهى الرئيس كلمته على وقع هتافات " بنحبك يا سيسي "، وألقى عدد كبير من المحتفلين الورود نحوه، وهو يلوح لهم بيديه، خارجا من الكاتدرائية في صحبة الحرس الجمهوري.