(عشان ربنا يحبك)

لأنك إنسان متعلم ومثقف وتواكب روح العصر فيجب أن يكون لك تواجد على الساحة الافتراضية.. فيس بوك.. مدونة.. على أقل تقدير يجب أن يكون لديك إيميل تستقبل عليه رسائل أصدقائك ومن يسعون إلى صداقتك ولأنك شخص ذو ضمير حى ونية سليمة ولأن الجميع يحرصون على سلامتك ومصلحتك فستجد كل يوم سيلا من الرسائل التحذيرية المهمة وستجد نفسك فى الكثير من الأحيان تصدقها وتشارك فى انتشارها حتى تتحقق رفعة المجتمع وصلاحه وصلاحك انت كمان ما هو كله عشان مصلحتك ومصلحتى ومصلحتنا كلنا والأهم عشان ربنا يحبك لااازم تبعتها..
أنا مثلا بعت 2 مليون حديث و4 ملايين آية و2 ونص مليار دعاء فى إيميلات لأصدقائى لأن أول واحد بعتهملى فى إيميل قاللى إن عشان ربنا يحبنى لازم أنشره وحذرنى إنى لو ما عملتش كده هيحصل لى 7 مصايب وداهيتين وبلوة وهاعيش بقيت حياتى أقلب فى التليفزيون ما ألاقيش غير البيت بيتك بيقدمه تامر أمين..
ولو بتحب فلسطين وعروبتك وقوميتك يبقى أكيد هتنشر الإيميل اللى بيتكلم عن الشركات الداعمة لإسرائيل وتنفذ اللى فيه فتقاطع كل شركات المشروبات الغازية وغير الغازية وخاصة عصير قصب عم سيد الدوكش لأن الراجل ده تحوم حوله الشبهات وبيقولوا لو مسكت كوباية من كوبايات العصير بتاعته ولفتها بسرعة فى الهوا وغمضت عينيك الاتنين وفنجلت ودانك ع الآخر وسديت واحدة من فتحتين مناخيرك ووقفت على رجل واحدة هتشوف مكتوب على الكوباية بخط كبير «عليك واحد» وهو ما يدل على أن الرجل يقدم دعما غير مباشر لإسرائيل وده طبعا غير الدعم المباشر اللى بيقدمه عم مصيلحى بتاع الأنابيب اللى الإيميل اللى وصلنى بيقسم بأغلظ الأيمان إن نداءه المتوالى «أنابيب.. أنابيب.. أنا بيب»
ما هو إلا اختصار لجملة «أنا باحب تل أبيب» بالله عليك يا أخى لازم تقاطعه.. جالك الميل اللى بيدعوك للوقوف وقفة احتجاجية ضد الشعب الهولندى اللى هيحرق نسخ من القرآن يوم السبت؟.. لازم تييجى يا أخى أنا كل أسبوع بانوى أروح بس المشكلة إنهم بقالهم سنة بيبعتولى الميل ده وبيقولوا السبت بس ما بيقولولش السبت سنة كام.. طب جالك ميل البنت اللى علت صوتها على أمها؟..
شفت صورتها لما اتحولت معزة؟ والواد اللى ما كانش بيصلى ومقضى عمره بلاى ستيشن وأوصى يدفنوا تليفونه المحمول معاه بيتصلوا بيه بعديها بساعتين سمعوا صوت بيقولهم «جيم أوفر».. نشرت الميل بتاع إسلام تييرى هنرى ومادونا وبريتنى سبيرز والحاج مايكل جاكسون وشقيقه المغفور له بإذن الله الحاج ألفيس بريسلى؟ والإيميل اللى بيأكد إن وكالة ناسا مخبية إن يورى جاجارين وهو على سطح القمر بيضرب بودنه كده سمع صوت بيغنى وحوى يا وحوى إياحه؟
ارفع رأسك يا أخى إحنا وقتنا جاى والله.. المزعج مش إن موضوع تداول الرسائل ده منتشر المزعج إنه منتشر بين فئة من المفترض إنها مثقفة ومتعلمة وتتعامل يوميا مع تكنولوجيا يستخدمها الآخرون فى دفع عجلة التقدم بينما يحاول البعض هنا استخدامها كفرامل تبقينا فى أماكننا أو تعيدنا إلى الخلف والأكثر إزعاجا إن ما حدش بيحاول يتيقن من المعلومات دى أو يوصل لأصلها والمعظم بيصدق على طول أو بيخاف يعترض لأن الناس وقتها ممكن تتهمه بالكفر..
لغاية دلوقتى مش فاهمة الرسايل دى بيبعتها ناس قصدهم خير بيعملوا هدف وهمى لمجرد إيقاظ الهمم وتجميع الشباب والا الموضوع أخطر من كده وممكن يوصل لدرجة إن يكون خطة محكمة لابتزاز ضمائرنا اليقظة ومشاعرنا الدينية الفياضة ومحاولة تحويلنا إلى مجتمع يعادى المعرفة ويقدس الأساطير..
الآن يا أخى ويا أختى لو اقتنعت بفحوى هذه الرسالة فأقسم عليك أن تبعثها ل14557798 من أصدقائك وإلا هنبعتلك شيطان ياكل حتة من مناخيرك ويحطلك سيخ محمى فى صرصور ودنك.. عشان فلسطين.. عشان مصر.. عشان شبرا.. عشان ضميرك الصاحى ونخوتك وعروبتك لكن الأهم إنك لازم تبعتها عشان ربنا يحبك.