بالفيديو.. قصيدة «زيارة إلى ضريح جمال عبد الناصر» لفؤاد نجم

أهدى الشاعر أحمد فؤاد نجم إلى الرئيس الراحل جمال عبد الناصر قصيدة «زيارة إلى ضريح جمال عبد الناصر»؛ حيث وصفه ب«أمير الفقراء المصريين».

وقال "نجم" في قصيدته، التي أنشدها ببرنامج «بلدنا بالمصري» على قناة «أون تي في»، مساء الأربعاء:

السكة مفروشه تيجان الفل والنرجس
والقبه صهوة فرس عليها الخضر بيبرجس
والمشربيه عرايس بتبكى والبكى مشروع
مين دا اللى نايم وساكت والسكات مسموع؟
سيدنا الحسين ولا صلاح الدين ولا النبي ولا الإمام؟
دستور يا حراس المقام
طول ما الكلام بالشكل دا ممنوع؟
على العموم ..
أنا مش ضليع في علوم الانضباط
أبويا كان مسلم صحيح وكان غبي
وكان يصلي ع النبي عند الغضب والانبساط
أبويا كان فلاح تعيس في ليلة ضلمة خلَّفوه
وف خرقة سودا لفلفوه وف عيشة غبرا طلّعوه
وعشه مايلة سكنوه ولصموه وطلسموه ودجنوه
وجهزوه وجوزوه على عماه
فكان محير في هواه ما بين أمي والجاموسة
وكان يخاف يقتل ناموسة
وكان خجول خجول خجول
لكنه كان دايما يقول أستغفر الله العظيم من باب الاحتياط
أبويا طلعتوه حمار فكان طبيعي يجيبني جحش!!!
لا أعرف نبي من أجنبي
ولا مين ماجاش ولا فين مارحش
موسى نبي عيسى نبي
محمد نبي وكل عصر له أدان
وإحنا نبينا كده من ضلعنا نابت
لا من سمَّاهم وقع ولا من مرا شابت
ولا انخسف له القمر ولا النجوم غابت
أبوه صعيدي وفهم قام طلّعه ظابط
ظبط على قدنا وعلى المزاج ظابط
فاجومي من جنسنا ما لوش مرا سابت
فلاح قليل الحيا إذا الكلاب عابت
ولا يطاطيش للعدا مهما السهام صابت
عمل حاجات معجزة وحاجات كتير خابت
وعاش ومات وسطنا على طبعنا ثابت
وان كان جرح قلبنا كل الجراح طابت
ولا يطولوه العدا مهما الأمور جابت"