شباك علي الثورة

زيارة لضريح عبدالناصر

تيجان الفل والنرجس
والقبة صهوة فرس
عليها الخضر بيبرجس
والمشربية عرايس بتبكي
والبكا مشروع
مين دا اللي نايم وساكت
والسكات مسموع؟
سدنا الحسن
ولا صلاح الدين؟
ولا النبي؟
ولا الإمام؟
دستور يا حراس المقام
طول ما الكلام بالشكل دا
ممنوع
***
علي العموم
أنا مش ضليع
في علوم الانضباط
أبويا كان مسلم صحيح
وكان غبي
وكان بيصلي ع النبي
عند الغضب والانبساط!
***
أبويا طلعوه حمار
فكان طبيعي يحبني جحش
لا أعرف نبي من أجنبي
ولا مين ما جاش
ولا فين ماراحش
موسي نبي
عيسي نبي
محمد نبي
وكل وقت وله أدان
وكل عصر وله نبي
واحنا نبينا كده
من ضلعنا نابت
لا من سماهم وقع
ولا من مرا شابت
ولا انخسف له القمر
ولا النجوم غابت
أبوه صعيدي وفهم
قام طلعه ظابط
ظبط علي قدنا
وع المزاج ضابظ
فاجومي من جنسنا
مالوش مرا شابت
فلاح قليل الحيا
إذا الكلاب عاوت
ولا يطاطيش للعدا
مهما السهام صابت
عمل حاجات معجزة
وحاجات كتير خابت
وعاش ومات وسطنا
علي طبعنا ثابت
وان كان جرح قلبنا
كل الجراح طابت
ولا يطولوه العدا
مهما الأمور جابت
***
أهدي هذه القصيدة إلي روح صديقي الجميل نادر عازف الإيقاع العبقري الذي بلغني بالأمس فقط نبأ استشهاده في ريف دمشق برصاص قوات أمن بشار الأسد أول الوارثين في وطننا العربي التعيس ب«حكم العسكر».