رسايل اللي عنيها العالم

(1)
احنا الأمل و الأرض كرويه
بتلف بينا و الزمان راضي
لو تحضنيني و تسكني فيا
هتلف برضوا بس ع الفاضي
(2)
هي الكواكب مالها زعلانه ؟
غيرانه و لا بنقلب التواريخ ؟
ألمس إيديكي تكشَّر الزهرة
أحضن عينيكي يعيَّط المريخ !!!
(3)
محتار بجد أبوسها و لا استني
بنت و ولد و الدنيا لمَّاحه
الجاذبيه و الخروج م الجنه
و حاجات كتير بدأت بتفاحه !!!
(4)
بتضحكي/ نستورد السكر
و تعيطي/ تغرق الملايين دموع القمر
و تبصي علي وش الإشارة/ يحمر من كتر الخجل
يا مخالفه قوانين المرور بقانون عنيكي المرتجل
حبك خطر علي أمننا القومي
(5)
من غير زعل
و انا معاكي/ باشوف الدنيا بايخه بجد
.
.
.
.
.
دي آخر مره ابص هنااااااااااااااااااااااااااااك
و انا معاكي
(6)
عشرين شتا ما قلعتش النضارة يوم
أسوان دفا/ أفتح خلاص المشربية ؟!
أول ما تيجي تقولي قلبي عرف يعوم
هاطلع معاه رحلة بكا لاسكندرية
(7)
ممكن بلاش تتنهدي وقت الفراق ؟
ما بقاش خلاص عند الشجر
من احتياطي الأكسجين
غير نص تنهيده
(8)
إرهاب / دمار شامل/ صراع حضارات
و أوزون بينقص/ و انهيار بورصات
أزمة ( غذاء) / فقر/ و دروع صواريخ
يا فرصه جات للأرض م المريخ
ضميني لجل أصلّح العالم
عبدالله صبري