وائل غنيم يكتب: هييييييييييه اتضرب..

كنت هاطنش الشائعات اللي نشرتها بعض المواقع المجهولة عن إنه تم الاعتداء عليّ وانطردت من الاتحادية لولا إني لقيت بعض الناس اللي المفروض فيهم المصداقية وتحري مصادر أخبارهم بيرددوا نفس الكلام لإثبات إن الاتحادية مليئة بمن يسمونهم بالفلول (أو كارهي الثورة) .. فحبيت أوضح كذا نقطة:

1) لم يحدث أي اشتباكات معي بأي شكل من الأشكال سوى تجمع البعض والهتاف ضدي (وتاني للتأكيد زي ما قلت امبارح أنا مقتنع 100% إن ده حقهم لأنهم بيعبروا عن رأيهم). وقوبلوا بتجمع أكبر من الشباب التفوا حولي ورفضوا مغادرتي المكان وانتهت الأزمة بعد دقائق من فوضى الأماكن المزدحمة -محدش بيسمع حد وعشرين اقتراح في الثانية- وبالفعل فضلت قاعد ساعتين بعد الحادثة دي في نقاشات وتوضيح وجهات نظر. الفيديوهات موجودة الآن على يوتيوب البحث عنها لمن يريد التأكد من إن قصة الضرب والطرد والكلام ده غير حقيقي (مش حابب أنشرها لأنها احتوت على ألفاظ بذيئة ضد مرشح رئاسي أنا كنت ضده).

2) أي شخص بيظهر في وسائل الإعلام بيكون فيه ناس بيحبوه وناس بيكرهوه. ناس بيثقوا فيه وناس بيسيئوا فيه الظن. ودي ظاهرة إنسانية طبيعية. الشخص اللي بيكرهني هو بيكره مواقفي السياسية أو صورتي الإعلامية، وكذلك العكس اللي بيحبني بيحب مواقفي السياسية أو صورتي الإعلامية. وأنا دوري هنا ليس السعي لنيل رضا الناس أو الخوف من غضبهم ضدي، لكن دوري هو دائما الصدع بما أراه حقا وأوضح وجهة نظري للجميع ولا أستطيع التحكم في ردود أفعال الناس الرافضين لآرائي لأن ده بيعتمد على درجة وعيهم وثقافته مش على رأيي.

3) فكرة إن أي شخص يتجمع حواليه ناس ويعتدوا عليه لفظيا أو جسديا هي فكرة مع سهولة حدوثها لأي شخصية عامة لكنها فكرة غير أخلاقية بالنسبة لي وغير مقبولة سواء كانت مع حد أكرهه أو أحبه أختلف معاه أو أتفق معاه ولا أبررها لأي شخص وأرفضها. أنا كتبت من قبل أنني كما رفضت الاعتداء على د. أبو الفتوح يوم جنازة جنودنا المصريين اللي ماتوا في رفح رحمهم الله، رفضت أيضا الاعتداء على شفيق أثناء توجهه للجنة الانتخابية (على فكرة ده مش كلام جديد ده كلام أنا كتبته من شهور). لأني باحب أوزن الأمور بميزان الأخلاق والمبادئ وأجتهد قدر ما أستطيع إني أحارب الازدواجية اللي هي عادة بشرية طبيعية.

4) مسألة إن اللي مش بيحب أو بيكره فلان الفلاني يبقى أكيد ضد الثورة .. أمر غير صحيح. أعرف ناس مع الثورة وضدي شكلا وموضوعا وأحترم مواقفهم وأتفهمها. من يخرج للناس ويقول: "الناس كلها تحبني .. الناس كلها تؤيدني .. الناس كلها تحترمني" هو شخص كاذب.

على العموم: أشكر كل من كتب رادّا عنّي غيبتي .. وربنا يهدي مجموعة: "هييييييه اتضرب".