شفت منظر مهول النهاردة وأنا راكبة المترو، نقيب في الجيش دخل عربية السيدات ودخل معاه كذا راجل، فبنت بتقول للنقيب "مينفعش تركب هنا عشان دي عربية سيدات" فقام سيادة النقيب وبسرعة البرق ادى البنت بالقلم على وشها بكل قوته لدرجة أن البنت من قوة الضربة وقعت على الأرض مغمى عليها، الستات كلها طبعا هاجت وماجت وقعدوا يزعقوا والي راحت تسعف البنت ويرشوا على وشها مية والرجالة الي دخلوا ولا نطقوا... واحدة من الي كانوا موجودين لقيتها بتقولي: "اتفرجي على رجالة الجيش، الجيش والشرطة زي بعض". أنا بقى مش شايفة أنها مسألة جيش ولا شرطة، أنا شايفاها مسألة انعدام رجولة.. يعني ايه واحد يضرب واحدة ست؟ دا حتى ربنا لما شرع للراجل أنه يأدب مراته خلى التأديب دا يكون بشروط، النبي صلى عليه وسلم كان يضرب أزواجه بالسواك ضربا تانيبي وليس انتهاك لادميتها...قال رسول الله صلى الله عليه وسلم: "( اتقوا الله في النساء، فإنكم أخذتموهن بأمانة، واستحللتم فروجهن بكلمة، ولكم عليهن ألا يوطئن فرشكم أحداً تكرهونه، فإن فعلن فاضربوهن ضرباً غير مبرح ) رواه مسلم... يعني حتى في دي كان بيقول ضرب غير مبرح.. ومع ذلك كله لم يفعل النبي ذلك قالت عائشة رضي الله عنها: "ما ضرب رسول الله صلى الله عليه وسلم امرأة له قط" رواه النسائي يعني ايه ابقى ماشية في الشارع وواحد يحاول يتحرش بيا فأنا ازقه بعيد عني يبدأ يشتمني بأفظع الألفاظ وكل الرجالة أصحاب المحلات والي واقفين بعربيتهم مخروسين ولا حتى حد قاله احترم نفسك! يعني ايه واحدة صحبتي تدخل محل تستنجد بصاحبه وتقوله فيه واحد ماشي ورايا وأنا مش عارفة اعمل ايه يقولها وأنا مالي؟!! يعني ايه واحد يقبل على نفسه انه مراته تصرف على البيت ويعتبر أن دا واجبها عشان العيشة صعبة؟ لا يا حبيبي، الراجل المفروض يكون كفيل ببيته ومراته وعياله، ولو الست ساهمت بحاجة فدا تفضل منها ومش فرض عليها أبدا حتى لو كانت غنية وممكن ترجع للشرع في الموضوع دا، ولو أنت مش قادر تتحمل مصاريف بيت وأسرة يبقى مش تتهبب تتجوز وتقرف البني أدمه الي هتتجوزها في عيشتها. قال بيقولك ضل راجل ولا ضل حيطة، لا، ضل الحيطة أحسن لو الراجل مش راجل. يعني ايه ابقى ماشية في الشارع اشوف راجل ماشي قدام مراته الي ماشية وراه وماسكة في ايدها بنتين صغيرين بيشتمها بألفاظ في منتهى السفالة رغم أنه كان بدقن والمصيبة انه كان شايل مصحف!! مهما كانت مراته عملت ازاي يشتمها وهو ماشي معها في الشارع؟ قدام بناته؟ ازاي يشتمها بألفاظ زي دي؟ أزاي يشتمها أصلا؟!!!!!! لو مراتك قليلة الأدب احتويها وحاول تأدبها بالحسنى، مش عارف وانت مش قادر عليها طلقها...خليك راجل واحترم نفسك وطلقها انما مش تدي لنفسك أعذار أنك تهين أو تضرب واحدة ست. هو الرجولة الصوت العالي والضرب؟ الرجولة أن تقول لمراتك اعملي ومتعمليش وبس؟ الرجولة أنك تكون أسد هصور في بيتك في الشخط والنطر ونعامة في أي حاجة تانية؟ طب احنا ناقصات عقل ودين، فين الدين والعقل بتاعكم؟ فين النخوة؟ بسم الله الرحمن الرحيم:" الرِّجَالُ قَوَّامُونَ عَلَى النِّسَاءِ بِمَا فَضَّلَ اللَّهُ بَعْضَهُمْ عَلَى بَعْضٍ وَبِمَا أَنْفَقُوا مِنْ أَمْوَالِهِمْ فَالصَّالِحَاتُ قَانِتَاتٌ حَافِظَاتٌ لِلْغَيْبِ بِمَا حَفِظَ اللَّهُ وَاللَّاتِي تَخَافُونَ نُشُوزَهُنَّ فَعِظُوهُنَّ وَاهْجُرُوهُنَّ فِي الْمَضَاجِعِ وَاضْرِبُوهُنَّ فَإِنْ أَطَعْنَكُمْ فَلَا تَبْغُوا عَلَيْهِنَّ سَبِيلًا إِنَّ اللَّهَ كَانَ عَلِيًّا كَبِيرًا " سورة النساء وبرضة بأكد ان كلمة الضرب هنا مقصود بيها ضرب "تأديبي" يعني مش فيه أذى اعتقد مفيش كلام أبلغ من كدا أنا شايفة إننا نضيف لمطالب الثورة أن الكائنات الي يطلق عليها تشريحيا "رجالة" يبقوا رجالة بجد، وإلا يلبسوا طرح ويقعدوا في بيوتهم... الرجولة يعني موقف، يعني تحمل الضغوط الصعبة، يعني عارف يعني ايه مسئولية بيت وأسرة، يعني بيحترم مراته، الرجولة يعني نخوة...الرجولة حاجات كتير قوي بس مش بينها الشكل الخارجي أبدا يا ريت كل واحد يسأل نفسه، هو راجل تشريحيا بس فيعتبر بذلك مش راجل أساسا ولا راجل بجد؟ مواقفك هي الي بتحدد