القارىء ابراهيم الهادي يكتب : مصر لسة ما ماتتش

هي ثورة و الا مش قولوا يا اللي بألف وش
هي ثورة والا هوجة هي حق والا غش
قولوا باللي بألف وش
دول شباب فرفور وفاضي لو نفخنا فيه يكش
والا دولا ناس غلابة كان وراهم ناس بكرش
قولوا يا اللي بألف وش
أيوه عملوها شبابنا أيوه مصر ما اتنستش
كنا فاكرين الديابة صاحية دايما ما نامتش
جت أسود وقلولها كش
في الميدان واقفين جنودنا والجنود ما بتنسحبش
مش ح تضرب في شبابها ده شباب ما ينضربش
جيشنا مش بألف وش
شعب واحد قلب واحد مش قلوب زي الكاوتش
قبطي مسلم ست راجل لو ح ناكل دود ومش
مصر صحيت ما نامتش
مصر جاية للتاريخ مصر لسة ما راحتش
والتاريخ شاهد عليها لو بتمرض ما ماتتش
مصر لسة ما ماتتش